काठमाडौं । नेपाल प्रिमियर लिग (एनपीएल) को तेस्रो सिजनका लागि काठमाडौं गोर्खाजले श्रीलंकन अलराउन्डर सहान अराचिगेलाई अनुबन्ध गरेको छ।

टोलीले बुधबार सामाजिक सञ्जालमार्फत अराचिगेलाई आफ्नो टोलीमा भित्र्याएको जानकारी सार्वजनिक गरेको हो। अनुभवी अलराउन्डर अराचिगेको आगमनसँगै काठमाडौं गोर्खाजले आगामी सिजनका लागि आफ्नो टोली थप मजबुत बनाउने प्रयास गरेको छ।

अराचिगेले हालसम्म १०३ वटा टी–२० खेल खेल्दै १ हजार ४६२ रन बनाएका छन् भने बलिङतर्फ ५४ विकेट लिइसकेका छन्। उनले श्रीलंका राष्ट्रिय टोलीबाट पाँच एकदिवसीय अन्तर्राष्ट्रिय तथा एक टी–२० अन्तर्राष्ट्रिय खेलसमेत खेलिसकेका छन्।

त्यसैगरी, अराचिगेसँग नेतृत्वको अनुभवसमेत छ। उनले श्रीलंका ‘ए’ टोलीको कप्तानीसमेत गरिसकेका छन्।

लंका प्रिमियर लिगमा प्रभावशाली प्रदर्शन

हालै सम्पन्न लंका प्रिमियर लिगमा अराचिगेले गले गालान्ट्सको उपाधि यात्रामा महत्वपूर्ण योगदान दिएका थिए। गलेले पहिलोपटक प्रतियोगिताको उपाधि जित्दा अराचिगेले ११ खेलमा २४० रन बनाएका थिए।

ब्याटिङसँगै उपयोगी बलिङ गर्न सक्ने अराचिगेको आगमनले काठमाडौं गोर्खाजलाई टोली सन्तुलनमा थप विकल्प उपलब्ध गराउने अपेक्षा गरिएको छ।

अराचिगेलाई अनुबन्ध गरेसँगै काठमाडौं गोर्खाजमा विदेशी खेलाडीको संख्या दुई पुगेको छ। यसअघि टोलीले भारतीय खेलाडी केएस भरतसँग सम्झौता गरिसकेको थियो।

एनपीएलको तेस्रो सिजनका लागि विदेशी खेलाडी भित्र्याउने क्रमसँगै काठमाडौं गोर्खाजले बलियो टोली निर्माणमा आफ्नो ध्यान केन्द्रित गरेको छ।

Originally published on abcnews.com.np.