काठमाडौं । जापानमा हुने २०औँ एसियाली खेलकुद (एसियाड) मा स्वर्ण पदकसहित दोहोरो अंकमा पदक जित्ने लक्ष्यसहित नेपाली राष्ट्रिय टोली अन्तिम तयारीमा जुटेको छ।

यसअघि पटक–पटक रोकिँदै आएको प्रशिक्षण अहिले पुनः सञ्चालनमा आएको छ। राष्ट्रिय खेलकुद परिषद् (राखेप)ले एसियाड तयारीका लागि साउन ३ देखि १७ गतेसम्म विशेष प्रशिक्षण सञ्चालन गरेको थियो। त्यसपछि साउन १८ देखि असोज २ गतेसम्म बन्द प्रशिक्षण जारी छ।

एसियाडमा सहभागी हुने २२ खेलमध्ये ७ खेलका खेलाडी वैदेशिक प्रशिक्षणमा छन् भने अन्य खेलका खेलाडीले स्वदेशमै तयारी गरिरहेका छन्। राष्ट्रिय टिम तयारी समितिका उपनिर्देशक दीपक श्रेष्ठका अनुसार यसपटक विगतको तुलनामा नेपाली टोलीको तयारी व्यवस्थित र प्रभावकारी भइरहेको छ।

श्रेष्ठका अनुसार १९औँ एसियाडपछि राखेपले नयाँ अवधारणासहित तयारी अघि बढाएको हो। लामो समयको तयारी र प्रभावकारी प्रशिक्षणको अभावकै कारण विगतमा अपेक्षित सफलता हासिल गर्न नसकिएको उनको भनाइ छ।

‘१९औँ एसियाड सकिएपछि राखेपले नयाँ अवधारणा ल्याएको हो। त्यो समयदेखि नै सीमित खेलहरूलाई प्रशिक्षण दिइरहेका थियौँ। स्वर्ण पदक जित्न नसक्नुको कारण लामो तयारी र प्रभावकारी प्रशिक्षण नहुँदा हो,’ श्रेष्ठले भने।

तर, तयारीका लागि आवश्यक बजेट भने पर्याप्त नभएको उनले बताए। उनका अनुसार टिम तयारीका लागि ४० देखि ५० करोड रुपैयाँसम्मको बजेट माग गरिए पनि अन्तिममा करिब २ करोड रुपैयाँ मात्र प्राप्त हुने गरेको छ। सीमित बजेटमै उपलब्ध स्रोतसाधनको प्रयोग गरेर खेलाडीलाई प्रशिक्षण दिइरहेको उनले बताए।

‘पहिला बढीमा डेढ महिनासम्म प्रशिक्षण हुन्थ्यो। अहिले लामो समयसम्म प्रशिक्षण भइरहेको छ,’ श्रेष्ठले भने।

नेपालले एसियाडमा सहभागिता जनाउन थालेको ७५ वर्ष पुगे पनि हालसम्म ३ रजत र २३ कांस्य गरी २६ पदक मात्र जितेको छ। यसपटक भने राखेपले स्वर्ण पदक जित्ने महत्वाकांक्षी लक्ष्य अघि सारेको छ।

राखेपले पदकको सम्भावना बढी भएका खेल र खेलाडीलाई प्राथमिकतामा राखेर प्रशिक्षण गराइरहेको छ। श्रेष्ठका अनुसार करातेकी एरिका गुरुङ, बक्सिङका चन्द्रबहादुर थापा, महिला कबड्डी टोली र क्यानोइङबाट स्वर्ण पदकको सम्भावना देखिएको छ।

यस्तै, महिला भलिबल टोलीले पनि एसियाडअघि अन्तर्राष्ट्रियस्तरको प्रशिक्षण पाउने सम्भावना रहेको राखेपले जनाएको छ।

सीमित बजेट र स्रोतसाधनका बाबजुद यसपटक लामो समयसम्म प्रशिक्षण सञ्चालन हुनु नेपाली खेलाडीका लागि सकारात्मक पक्ष मानिएको छ। अबको चुनौती भनेको प्रशिक्षणबाट प्राप्त तयारीलाई प्रतियोगितामा नतिजामा बदल्नु हुनेछ।

Originally published on abcnews.com.np.