काठमाडौं । रसुवामा तिब्बततर्फबाट भोटेकोशी नदीमा ठूलो बाढी प्रवेश गरेपछि त्रिशूली नदीको तटीय क्षेत्रमा उच्च सतर्कता अपनाउन आग्रह गरिएको छ।

जिल्ला प्रशासन कार्यालय, रसुवाका अनुसार भोटेकोशी नदीमा पानीको बहाव उच्च रहेको जानकारी प्राप्त भएको छ। बाढीका कारण त्रिशूली नदी आसपासका क्षेत्रमा जोखिम बढ्न सक्ने भन्दै सर्वसाधारणलाई सचेत गराइएको हो।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले रसुवा, नुवाकोट, धादिङ, गोरखा र चितवन हुँदै बग्ने त्रिशूली नदीलगायतका तटीय क्षेत्रमा बसोबास गर्ने नागरिकलाई उच्च सतर्कता अपनाउन आग्रह गरेको छ।

प्राधिकरणका कार्यकारी प्रमुख धर्मराज उप्रेतीले तिब्बततर्फबाट आएको ठूलो बाढी भोटेकोशी नदीमा प्रवेश गरेको जानकारी दिँदै अर्को सूचना जारी नभएसम्म त्रिशूली नदीको तटीय क्षेत्र, मुग्लिनसम्म, उच्च सतर्कताका साथ सुरक्षित स्थानमा रहन आग्रह गरेका छन्।

उनले भने, ‘भोटेकोशी नदीमा तिब्बततर्फबाट ठूलो बाढी प्रवेश गरेको छ। त्यसैले अर्को सूचना नआउँदासम्म त्रिशूली नदीको तटीय क्षेत्र मुग्लिनसम्म उच्च सतर्कतासहित सुरक्षित स्थानमा रहन अनुरोध छ।’

तटीय क्षेत्रमा विशेष सावधानी

बाढीको जोखिमलाई ध्यानमा राख्दै नदी किनार तथा तटीय क्षेत्रमा रहेका बासिन्दालाई नदीको बहाव बढेमा तत्काल सुरक्षित स्थानतर्फ जान प्राधिकरणले आग्रह गरेको छ।

विशेषगरी रसुवा, नुवाकोट, धादिङ, गोरखा र चितवनका त्रिशूली नदी आसपासका बस्तीमा जोखिम हुन सक्ने भएकाले स्थानीय प्रशासन तथा सुरक्षा निकायको सूचना पालना गर्न आग्रह गरिएको छ।

भोटेकोशीमा आएको बाढीको प्रभावले त्रिशूली नदीको जलसतह बढ्न सक्ने भएकाले अर्को सूचना नआएसम्म उच्च सतर्कता अपनाउन प्राधिकरणले अनुरोध गरेको छ।

Originally published on abcnews.com.np.