काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले भोटेकोसी बाढीबाट प्रभावित नागरिकको उद्धार तथा जीवनरक्षाका लागि सरकारले आफ्नो सम्पूर्ण सामर्थ्य परिचालन गर्ने विश्वास व्यक्त गरेका छन् ।

बुधबार प्रतिनिधिसभाको बैठकमा बोल्दै लामिछानेले विपद्को यस घडीमा रास्वपा सरकारसँगै रहेको बताए ।

उनले प्रधानमन्त्री, गृहमन्त्री, स्वास्थ्यमन्त्रीलगायतसँग निरन्तर छलफल तथा सूचना आदानप्रदान भइरहेको जानकारी दिए । बिहानदेखि विभिन्न तहमा भएको संवादका आधारमा सरकारले नागरिकको जीवनरक्षालाई पहिलो प्राथमिकतामा राखेर सम्पूर्ण सामर्थ्य परिचालन गर्ने विश्वास रहेको उनले बताए ।

लामिछानेले भने, “सरकारले सम्पूर्ण सामर्थ्य लगाउनेछ । नागरिकको ज्यान बचाउने कुरा यतिखेर सबैभन्दा महत्त्वपूर्ण कुरा हो ।”

उनले सरकारबाट बाढी प्रभावित क्षेत्रमा उद्धार तथा राहतका लागि सक्दो सक्रियता देखाइएको समेत बताए ।

नागरिकको जीवनरक्षा पहिलो प्राथमिकता

लामिछानेले विपद्को समयमा राजनीतिक विषयभन्दा नागरिकको जीवनरक्षालाई प्राथमिकतामा राख्नुपर्ने बताए ।

सरकारले उपलब्ध सबै स्रोतसाधन परिचालन गरी प्रभावित नागरिकको उद्धार, उपचार तथा राहतमा केन्द्रित हुनुपर्ने उनको भनाइ छ ।

Originally published on abcnews.com.np.