काठमाडौं । त्रिभुवन विश्वविद्यालय व्यवस्थापन संकाय, डीनको कार्यालयले प्राकृतिक विपत्तिबाट सिर्जित प्रतिकूल परिस्थितिका कारण नुवाकोटस्थित त्रिभुवन त्रिशूली बहुमुखी क्याम्पस परीक्षा केन्द्रमा सञ्चालन हुने स्नातकोत्तर तहको एमबीएस परीक्षा स्थगित गरेको छ।

व्यवस्थापन संकायद्वारा जारी सूचनाअनुसार २०८३ भदौ ११ गते सञ्चालन हुने एमजीटी ५२२ : इन्टरनेसनल बिजनेस विषयको परीक्षा अर्को सूचना नभएसम्मका लागि स्थगित गरिएको हो।

हालै आएको बाढी तथा प्राकृतिक विपत्तिका कारण त्रिशूली क्षेत्रको अवस्था प्रतिकूल बनेपछि परीक्षा स्थगित गर्ने निर्णय गरिएको संकायले जनाएको छ।

नयाँ मिति पछि सार्वजनिक गरिने

स्थगित परीक्षाको नयाँ मिति र समयबारे यथाशीघ्र अर्को सूचना प्रकाशित गरिने व्यवस्थापन संकायले जानकारी दिएको छ।

तर, त्रिभुवन त्रिशूली बहुमुखी क्याम्पस परीक्षा केन्द्रबाहेक अन्य सबै परीक्षा केन्द्रमा भने पूर्वनिर्धारित तालिकाअनुसार परीक्षा सञ्चालन हुने स्पष्ट पारिएको छ।

रसुवा–त्रिशूली क्षेत्रमा आएको विनाशकारी बाढीको प्रभावका कारण यातायात, सञ्चार तथा जनजीवन प्रभावित भइरहेका बेला त्रिभुवन विश्वविद्यालयले स्थानीय परिस्थितिलाई ध्यानमा राख्दै परीक्षा स्थगित गरेको हो।

Originally published on abcnews.com.np.