काठमाडौं । चीनको तिब्बत स्वायत्त क्षेत्रअन्तर्गत शिगात्से क्षेत्रको केरुङ काउन्टीमा बुधबार बिहान गएको भीषण पहिरो तथा आकस्मिक बाढीले ठूलो क्षति पुर्‍याएको छ। पहिरो र बाढीका कारण नेपाल–चीन सीमा जोड्ने प्रमुख व्यापारिक मार्ग आसपास सडक सञ्जाल, सञ्चार तथा विद्युत् सेवा प्रभावित भएको चिनियाँ सरकारी सञ्चारमाध्यम सिन्ह्वाले जनाएको छ।

प्राकृतिक विपत्तिपछि चिनियाँ राष्ट्रपति सी चिनफिङले बेपत्ता व्यक्तिको खोजी तथा उद्धार कार्यलाई तीव्र बनाउन निर्देशन दिएका छन्। उनले प्रभावित क्षेत्रमा थप विपत्ति हुन नदिन जोखिमयुक्त स्थानको निगरानी तथा पूर्वचेतावनी प्रणालीलाई समेत चुस्त बनाउन सम्बन्धित निकायलाई निर्देशन दिएको बताइएको छ।

केरुङ क्षेत्र नेपाल–चीनबीचको व्यापार, आवागमन तथा मालसामान ढुवानीका लागि महत्वपूर्ण क्षेत्र मानिन्छ। सोही क्षेत्र आसपास भएको पहिरोले सडक अवरुद्ध हुँदा दुई देशबीचको सीमा आवागमन तथा व्यापारिक गतिविधिमा समेत असर पर्ने देखिएको छ।

केही मानिस बेपत्ता, क्षतिको विवरण संकलन हुँदै

सिन्ह्वाका अनुसार पहिरो तथा आकस्मिक बाढीका कारण केही मानिस बेपत्ता भएका छन्। प्रभावित क्षेत्रमा उद्धार टोली परिचालन गरिएको छ भने हताहती तथा भौतिक क्षतिको विस्तृत विवरण संकलन भइरहेको बताइएको छ।

पहिरोपछि नदी तथा खोलामा पानीको बहाव बढ्न सक्ने र थप बाढी वा पहिरोको जोखिम कायम रहेकाले स्थानीय प्रशासनले उच्च सतर्कता अपनाएको जनाएको छ।

विशेषगरी पहाडी भूभागमा पहिरोले सडक अवरुद्ध गरेपछि उद्धार तथा राहत कार्यसमेत चुनौतीपूर्ण बन्न सक्ने देखिएको छ।

चिनियाँ दूतावासको आपतकालीन संयन्त्र सक्रिय

नेपालस्थित चिनियाँ दूतावासले पनि प्राकृतिक विपत्तिपछि आफ्नो आपतकालीन सहायता संयन्त्र सक्रिय बनाएको जनाएको छ। प्रभावित क्षेत्रमा रहेका चिनियाँ नागरिक तथा व्यवसायीको सुरक्षा अवस्थाबारे जानकारी संकलन तथा मूल्यांकन भइरहेको बताइएको छ।

दूतावासले नेपालमा रहेका चिनियाँ नागरिक र संस्थालाई मौसम पूर्वानुमान, सडकको अवस्था तथा स्थानीय प्रशासनले जारी गर्ने सूचनाको नियमित अनुगमन गर्न आग्रह गरेको छ।

नदी किनार, पहाडी खोँच तथा बाढी–पहिरोको उच्च जोखिम भएका क्षेत्रमा नजान र कार्यस्थल तथा आवास क्षेत्रमा आवश्यक सुरक्षा सतर्कता अपनाउन समेत अनुरोध गरिएको छ। सम्भावित आपतकालीन अवस्थालाई ध्यानमा राख्दै आवश्यक सामग्री तयारी अवस्थामा राख्न पनि दूतावासले आग्रह गरेको छ।

केरुङ नाकाको व्यापारमा असर पर्ने सम्भावना

केरुङ क्षेत्र नेपाल–चीनबीचको प्रमुख व्यापारिक नाकामध्ये एक भएकाले सडक, सञ्चार र विद्युत् सेवा अवरुद्ध हुँदा व्यापारिक गतिविधिमा प्रत्यक्ष असर पर्ने देखिएको छ।

पहिरोका कारण सीमा क्षेत्रतर्फ जाने सडक अवरुद्ध भएपछि मालवाहक सवारीसाधनको आवागमन प्रभावित हुन सक्नेछ। नाकाको अवस्था कहिलेसम्म सामान्य बन्ने भन्नेबारे भने तत्काल स्पष्ट हुन सकेको छैन।

यसैबीच, केरुङ र आसपासको तिब्बती क्षेत्रमा आएको प्राकृतिक विपत्तिको घटनालाई नेपालतर्फ रसुवाको भोटेकोशी नदीमा आएको अस्वाभाविक बाढीसँग समेत जोडेर हेरिएको छ। भोटेकोशीको माथिल्लो जलाधार तिब्बत क्षेत्रमा पर्ने भएकाले त्यहाँ हुने ठूलो पहिरो, हिमपहिरो वा नदी अवरोधको प्रभाव नेपालतर्फ पनि पर्न सक्ने जोखिम रहन्छ।

यद्यपि, केरुङ क्षेत्रमा भएको पहिरो र रसुवाको भोटेकोशीमा आएको विनाशकारी बाढीबीच प्रत्यक्ष सम्बन्ध रहेको विषयमा भने सम्बन्धित निकायबाट औपचारिक पुष्टि हुन बाँकी छ। प्रभावित क्षेत्रमा उद्धार, खोजी तथा क्षति मूल्यांकनको काम जारी रहेको बताइएको छ।

Originally published on abcnews.com.np.