काठमाडौं । बैंक तथा वित्तीय संस्थामा निक्षेप संकलन र निजी क्षेत्रमा प्रवाहित कर्जा दुवै बढेको छ। पछिल्लो आर्थिक तथा वित्तीय अवस्थासम्बन्धी तथ्यांकअनुसार बैंक तथा वित्तीय संस्थाको निक्षेप परिचालन १३.९ प्रतिशतले बढेको छ भने निजी क्षेत्रमा प्रवाहित कर्जा ६.५ प्रतिशतले वृद्धि भएको छ।

समीक्षा अवधिमा बैंक तथा वित्तीय संस्थामा कुल निक्षेप ७२ खर्ब ९३ अर्ब रुपैयाँ पुगेको छ। त्यस्तै, निजी क्षेत्रमा प्रवाहित कर्जा ५५ खर्ब ५७ अर्ब ६ करोड रुपैयाँ पुगेको छ।

ब्याजदर तुलनात्मक रूपमा न्यून

बैंकिङ प्रणालीमा ब्याजदर पनि तुलनात्मक रूपमा न्यून रहेको छ। बैंक तथा वित्तीय संस्थाबीचको भारित औसत अन्तरबैंक ब्याजदर २.७५ प्रतिशत रहेको छ।

त्यस्तै, ९१ दिने ट्रेजरी बिलको भारित औसत ब्याजदर २.३२ प्रतिशत कायम भएको छ। वाणिज्य बैंकहरूको निक्षेपको भारित औसत ब्याजदर ३.२१ प्रतिशत र कर्जाको भारित औसत ब्याजदर ६.५५ प्रतिशत रहेको तथ्यांकले देखाएको छ।

कर्जा विस्तारसँगै आर्थिक गतिविधिमा सुधारको अपेक्षा

निक्षेप संकलनमा भएको वृद्धि र ब्याजदर तुलनात्मक रूपमा न्यून रहँदा निजी क्षेत्रमा कर्जा प्रवाहसमेत बढेको देखिएको छ। कर्जा विस्तारले उद्योग, व्यवसाय तथा आर्थिक गतिविधिमा वित्तीय स्रोतको पहुँच बढाउन सहयोग पुग्ने अपेक्षा गरिएको छ।

समग्रमा बैंकिङ प्रणालीमा निक्षेप वृद्धि, निजी क्षेत्रमा कर्जा विस्तार तथा ब्याजदरमा आएको सहजताले वित्तीय क्षेत्रमा सकारात्मक अवस्था देखिएको छ। रेमिट्यान्स आप्रवाह तथा विदेशी मुद्रा सञ्चितिमा भएको सुधारसँगै बैंकिङ प्रणालीका प्रमुख सूचकमा आएको वृद्धिले समग्र अर्थतन्त्रमा समेत सकारात्मक प्रभाव पार्ने अपेक्षा गरिएको छ।

Originally published on abcnews.com.np.