काठमाडौं । रसुवा जिल्लामा भदौ १० गते बिहान आएको विनाशकारी बाढीका विषयमा जलविज्ञान तथा जलस्रोत अनुसन्धान केन्द्रअन्तर्गतको बाढी पूर्वानुमान महाशाखाले विस्तृत प्राविधिक प्रतिवेदन तयार पारेको छ।

महाशाखाले तयार पारेको ‘२०८३ भोटेकोशी–त्रिशूली–नारायणी बाढीसम्बन्धी प्राविधिक प्रतिवेदन’ अनुसार, २०८३ भदौ १० गते बिहान ९:०५ बजेरसुवा जिल्लास्थित भोटेकोसी नदीमा तिब्बततर्फबाट ठूलो बाढी प्रवेश गरेको सूचना महाशाखालाई प्राप्त भएको थियो।

प्राप्त सूचना र उपलब्ध तथ्यांकको विश्लेषणपछि भोटेकोसी हुँदै आएको बाढी त्रिशूली नदीमा प्रवेश गरी क्रमशः तल्लो तटीय क्षेत्रतर्फ फैलिएको प्रतिवेदनमा उल्लेख गरिएको छ।

९:१५ बजेदेखि पूर्वसूचना र सतर्कता सन्देश

महाशाखाले बाढीको सूचना प्राप्त भएपछि बिहान ९:१५ बजेदेखि नै उपलब्ध जलसतह, बाढीको बहावको यात्रा तथा विभिन्न स्थानबाट प्राप्त सूचनाका आधारमा सम्बन्धित जिल्ला, नदी तटीय क्षेत्र र जोखिमयुक्त बस्तीमा निरन्तर पूर्वसूचना तथा सतर्कता सन्देश प्रवाह गरेको जनाएको छ।

प्रतिवेदनमा भनिएको छ कि समयमै प्रवाह गरिएको सूचना र सतर्कताका आधारमा धेरै नागरिकले सुरक्षित स्थानमा पुगेर आफ्नो ज्यान जोगाउन सफल भएका छन्।

भोटेकोसीदेखि नारायणी–देवघाटसम्म बाढीको प्रभाव

महाशाखाको प्रारम्भिक प्राविधिक विश्लेषणअनुसार भोटेकोसीमा प्रवेश गरेको ठूलो बाढीको बहाव त्रिशूली नदी हुँदै तल्लो तटीय क्षेत्र पार गर्दै नारायणी–देवघाट क्षेत्रसम्म पुगेको थियो।

प्रतिवेदनमा बाढीको समय, बहावको यात्रा, विभिन्न नदी तटीय क्षेत्रमा देखिएको प्रभाव तथा उपलब्ध जलसतहसम्बन्धी तथ्यांकलाई समेटिएको बताइएको छ।

यो प्रतिवेदनले रसुवा–नुवाकोट हुँदै त्रिशूली र नारायणी नदी प्रणालीमा फैलिएको बाढीको घटनाक्रमलाई प्राविधिक रूपमा अध्ययन गर्दै भविष्यमा यस्ता आकस्मिक बाढीको पूर्वसूचना प्रणाली, सीमापार सूचना आदानप्रदान र तटीय क्षेत्रको विपद् तयारीलाई अझ प्रभावकारी बनाउन आधार प्रदान गर्ने अपेक्षा गरिएको छ।

Originally published on abcnews.com.np.