काठमाडौं । रसुवा र नुवाकोटमा थप ठूलो बाढी आउने भन्दै सामाजिक सञ्जालमा फैलिएको सूचनामा कुनै आधिकारिकता नभएको बाढी पूर्वानुमान महाशाखाले स्पष्ट पारेको छ।

जल विज्ञान तथा जलस्रोत अनुसन्धान केन्द्र मातहतको महाशाखाका अनुसार हालसम्म प्राप्त सूचना र प्रारम्भिक विश्लेषणबाट थप ठूलो बाढी आउने कुनै विश्वसनीय आधार देखिएको छैन।

महाशाखाले नागरिकलाई संयमित रहन तथा अपुष्ट सूचना र हल्लाको पछि नलाग्न आग्रह गरेको छ।

वर्षाले नदीको बहाव बढ्न सक्ने

रसुवा र नुवाकोट क्षेत्रमा वर्षा भइरहेकाले नदीको बहाव केही बढ्न सक्ने भए पनि हालसम्म थप विनाशकारी बाढी आउने सम्भावना नदेखिएको महाशाखाले जनाएको छ।

नेपालतर्फ कुनै ठूलो बाढी प्रवेश गर्ने अवस्था देखिएमा सीमा क्षेत्रमा तैनाथ सुरक्षा निकाय तथा सम्बन्धित निकायसँग समन्वय गरी तत्काल जानकारी गराइने महाशाखाले जनाएको छ।

आधिकारिक स्रोतको सूचना मात्र मान्न आग्रह

बाढीको जोखिम देखिएमा एसएमएसलगायत उपलब्ध सञ्चारमाध्यमबाट यथाशीघ्र आधिकारिक पूर्वसूचना प्रवाह गरिने महाशाखाले स्पष्ट पारेको छ।

महाशाखाले बाढीसम्बन्धी सूचना प्राप्त गर्दा आधिकारिक स्रोतलाई मात्र आधार मान्न र आवश्यक सावधानी अपनाउन नागरिकलाई आग्रह गरेको छ।

थप जानकारी तथा बाढीसम्बन्धी आधिकारिक पूर्वसूचनाका लागि महाशाखाको वेबसाइट तथा आधिकारिक सूचना प्रणाली हेर्न आग्रह गरिएको छ।

Originally published on abcnews.com.np.