नुवाकोट । भोटेकोशी नदीमा आएको बाढीका कारण विद्युत् आपूर्ति अवरुद्ध भएका नुवाकोटका विभिन्न क्षेत्रमा नेपाल विद्युत् प्राधिकरणले वैकल्पिक प्रसारण व्यवस्थामार्फत विद्युत् सेवा पुनः सञ्चालनमा ल्याएको छ।

प्राधिकरणका अनुसार खरानीटार, समुन्द्रटार, चौगाडा, लिखु, पञ्चकन्या र विदुरलगायतका क्षेत्रमा सिन्धुपाल्चोकबाट वैकल्पिक लाइनमार्फत विद्युत् आपूर्ति गरिएको हो।

यस्तै, त्रिशूली क्षेत्रका केही स्थानमा धादिङको सल्यानटार सबस्टेसनमार्फत समेत विद्युत् आपूर्ति भइरहेको छ।

विद्युत् सेवा थप नियमित बनाउने प्रयास

चपली सबस्टेसनबाट चपली–देवीघाट ६६ केभी तथा ११ केभी लाइन र बालाजु–त्रिशूली ११ केभी लाइन सञ्चालनमा ल्याउन प्राविधिक काम तीव्र पारिएको छ।

ऊर्जा, जलस्रोत तथा सिँचाइमन्त्री विराजभक्त श्रेष्ठको सचिवालयका अनुसार प्रभावित क्षेत्रमा विद्युत् सेवा सकेसम्म बिहीबार साँझसम्म थप नियमित बनाउने प्रयास भइरहेको छ।

बाढीबाट क्षतिग्रस्त विद्युत् संरचनाको निरीक्षण तथा मर्मतका साथै वैकल्पिक आपूर्ति व्यवस्थापनका लागि काठमाडौं तथा आसपासका क्षेत्रबाट दक्ष प्राविधिक जनशक्ति, उपकरण र आवश्यक स्रोतसाधनसहितका टोली प्रभावित क्षेत्रमा परिचालन गरिएको छ।

प्राधिकरणले क्षतिग्रस्त संरचनाको मर्मत तथा पुनःस्थापनासँगै वैकल्पिक माध्यमबाट विद्युत् आपूर्ति निरन्तर राख्न आवश्यक सबै प्राविधिक उपाय अपनाइरहेको जनाएको छ।

Originally published on abcnews.com.np.