काठमाडौं । रसुवास्थित भोटेकोसी नदीमा बुधबार आएको विनाशकारी बाढीपछि सुदूरपश्चिम प्रदेशका १०१ जना व्यक्ति सम्पर्कविहीन भएका छन्।

बाढी प्रभावित क्षेत्रमा रहेका व्यक्तिका परिवार र आफन्तहरूले उनीहरूसँग सम्पर्क हुन नसकेको भन्दै सुदूरपश्चिम प्रदेशका सम्बन्धित जिल्ला प्रहरी कार्यालयमा खोजीको लागि अनुरोध गरेका हुन्। भोटेकोसी बाढीपछि सम्पर्कविहीन भएको भन्दै सुदूरपश्चिम प्रदेशमा आफन्त तथा परिवारले प्रहरीमा जानकारी टिपाउने क्रम जारी रहेको छ।

बाढी प्रभावित क्षेत्रमा कार्यरत सेना, प्रहरी, कर्मचारी र जलविद्युत् आयोजनामा कार्यरत मजदुरका आफन्तहरूले प्रहरीसँग खोजीका लागि अपिल गरिरहेका छन्।

सम्पर्कविहीनको जिल्लागत विवरण

प्रदेश प्रहरी कार्यालयका अनुसार अहिलेसम्म कैलाली जिल्लाबाट ३१ जना, कञ्चनपुरबाट २९ जना, डडेल्धुराबाट १५ जना र बाजुराबाट १४ जना सम्पर्कविहीन रहेको जानकारी प्राप्त भएको छ।

यस्तै बैतडीबाट ४ जना, दार्चुलाबाट ३ जना, बझाङ र डोटीबाट २र२ जना तथा अछामबाट १ जना व्यक्ति सम्पर्कविहीन रहेको प्रदेश प्रहरी कार्यालयका एसएसपी पदमबहादुर विष्टले नेपालखबरलाई जानकारी दिए।

Originally published on abcnews.com.np.