बुटवल । चीनको तिब्बततर्फबाट बुधबार बिहान रसुवाको भोटेकोसी नदीमा आएको भीषण बाढीपछि लुम्बिनी प्रदेशका ९७ जना व्यक्ति सम्पर्कविहीन भएका छन्।

लुम्बिनी प्रदेश सरकारले दिएको जानकारीअनुसार उनीहरू विभिन्न कामको सिलसिलामा रसुवा पुगेका थिए। बाढी आएपछि उनीहरूसँग सम्पर्क हुन नसकेको जनाइएको छ।

प्रदेश सरकारले सम्पर्कविहीन व्यक्तिको अवस्था पत्ता लगाउन तथा खोजी कार्यलाई प्रभावकारी बनाउन सम्बन्धित निकायसँग समन्वय गरिरहेको जनाएको छ।

रुपन्देहीका सबैभन्दा धेरै २५ जना सम्पर्कविहीन

प्रदेश सरकारका अनुसार सम्पर्कविहीनमध्ये रुपन्देहीका सबैभन्दा धेरै २५ जना रहेका छन्। त्यसपछि दाङका १५ जना र रोल्पाका १४ जना सम्पर्कविहीन भएका छन्।

यस्तै, अर्घाखाँचीका नौ जना, बर्दियाका आठ जना, गुल्मीका छ जना, नवलपरासी (बर्दघाट–सुस्ता पश्चिम) का छ जना, पाल्पाका पाँच जना, प्युठानका पाँच जना तथा कपिलवस्तुका चार जना सम्पर्कविहीन रहेको जनाइएको छ।

सम्पर्कविहीन भएकामध्ये अधिकांश विभिन्न जलविद्युत् आयोजना, निर्माण कार्य तथा अन्य पेसासम्बन्धी कामका लागि रसुवा पुगेका थिए। सरकारी सेवामा कार्यरत कर्मचारी तथा घुम्न गएका केही व्यक्ति पनि सम्पर्कविहीन रहेको प्रदेश सरकारले जनाएको छ।

बाढी प्रभावित क्षेत्रमा खोजी तथा उद्धार कार्य जारी रहेको र सम्पर्कविहीन व्यक्तिको अवस्था पत्ता लगाउन विभिन्न सरकारी तथा सुरक्षा निकायसँग समन्वय भइरहेको जनाइएको छ।

Originally published on abcnews.com.np.