सुर्खेत । रसुवामा आएको भीषण बाढीपछि कर्णाली प्रदेशका विभिन्न जिल्लाबाट त्यहाँ पुगेका २१६ जना नागरिक सम्पर्कविहीन भएका छन्। तीमध्ये ३१ जना आफन्तको सम्पर्कमा आएका छन् भने अझै १८५ जनाको अवस्था अज्ञात रहेको छ।

कर्णाली प्रदेश प्रहरी कार्यालयका प्रवक्ता प्रहरी वरिष्ठ उपरीक्षक (एसएसपी) सन्तोषसिंह राठौरका अनुसार बिहीबार दिउँसो २ बजेसम्मको विवरणमा कर्णालीबाट रसुवा पुगेका २१६ जना बाढीपछि सम्पर्कविहीन भएका थिए। उनीहरूमा १८२ पुरुष, २६ महिला, पाँच बालक र तीन बालिका रहेका छन्।

हालसम्म २९ पुरुष, एक महिला र एक बालक गरी ३१ जना आफन्तको सम्पर्कमा आएका छन्।

प्रहरीका अनुसार जुम्लाबाट सम्पर्कविहीन भएका ८४ जनामध्ये १४ जना सम्पर्कमा आएका छन् भने ७० जनाको अवस्था अझै अज्ञात छ। सल्यानका ५२ जनामध्ये चार जना सम्पर्कमा आएका छन् भने ४८ जना सम्पर्कबाहिर छन्।

त्यस्तै, सुर्खेतका १९ जनामध्ये तीन जना, मुगुका १६ जनामध्ये तीन जना, रुकुम पश्चिमका १५ जनामध्ये तीन जना तथा हुम्लाका १२ जनामध्ये तीन जना आफन्तको सम्पर्कमा आएका छन्।

जाजरकोटका तीन जनामध्ये एक जना सम्पर्कमा आएका छन्। दैलेख र कालीकोटबाट सम्पर्कविहीन भएका नागरिकमध्ये हालसम्म कोही पनि सम्पर्कमा आउन सकेका छैनन्। डोल्पाबाट दुई जना सम्पर्कविहीन भएको जानकारी प्राप्त भएकोमा दुवै जनाको अवस्था अझै अज्ञात रहेको प्रहरीले जनाएको छ।

बाढी प्रभावित क्षेत्रमा सञ्चार तथा यातायात सम्पर्क विच्छेद भएका कारण सम्पर्कविहीन नागरिकको अवस्थाबारे यकिन विवरण प्राप्त गर्न कठिनाइ भइरहेको प्रहरीको भनाइ छ।

खोजी तथा सम्पर्क प्रयास तीव्र

प्रहरी प्रवक्ता राठौरका अनुसार सम्पर्कविहीन नागरिकको अवस्थाबारे जानकारी लिन खोजी तथा सम्पर्कको प्रयास तीव्र पारिएको छ।

रोजगारी तथा अन्य कामका सिलसिलामा रसुवा पुगेका कर्णालीका नागरिक बाढीमा परेपछि उनीहरूका परिवार चिन्तित बनेका छन्। आफन्तहरूले सुरक्षा निकायसँग सम्पर्क हुन नसकेका १८५ जनाको अवस्था यथाशीघ्र सार्वजनिक गर्न आग्रह गरेका छन्।

Originally published on abcnews.com.np.