काठमाडौँ । सरकारले बाढी, पहिरो तथा आगलागीजस्ता प्राकृतिक विपद्का समयमा उद्धार र राहत कार्यमा खटिने सुरक्षाकर्मीको भत्ता तथा दैनिक खाजा खर्च बढाउने निर्णय गरेको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी समितिको बिहीबार बसेको बैठकले नेपाल प्रहरी, सशस्त्र प्रहरी बल नेपाल र नेपाली सेनाका विपद् उद्धारमा खटिने जनशक्तिको सेवा सुविधा परिमार्जन गर्ने निर्णय गरेको हो।

प्राधिकरणका अनुसार विपद्का समयमा अग्रपङ्क्तिमा रहेर जोखिमपूर्ण अवस्थामा उद्धार तथा राहत कार्यमा खटिने सुरक्षाकर्मीको मनोबल बढाउन भत्ता तथा दैनिक खाजा खर्च वृद्धि गर्न लागिएको हो।

बैठकको निर्णयअनुसार सम्बन्धित सुरक्षा निकायले आवश्यक प्रक्रिया अघि बढाउन आफ्नो तालुकदार मन्त्रालयमा पत्राचार गर्नेछन्। त्यसपछि सम्बन्धित मन्त्रालयबाट औपचारिक निर्णय गरी सोहीअनुसार सेवा सुविधा कार्यान्वयन गरिनेछ।

सुरक्षाकर्मीको सेवा सुविधा बढाइने

प्राकृतिक विपद्का समयमा जोखिम मोलेर उद्धार तथा राहत कार्यमा खटिने सुरक्षाकर्मीलाई प्रोत्साहन गर्न थप सेवा सुविधा उपलब्ध गराउने विषयमा बैठकमा छलफल भएको थियो।

विपद्कालीन कार्यमा खटिने सुरक्षाकर्मीले हाल प्राप्त गर्दै आएको भत्ता तथा दैनिक खाजा खर्च पर्याप्त नभएको गुनासो रहँदै आएको थियो। नयाँ व्यवस्थाले उनीहरूको मनोबल बढाउनुका साथै विपद् व्यवस्थापनमा थप प्रभावकारी रूपमा परिचालन गर्न सहयोग पुग्ने प्राधिकरणको अपेक्षा छ।

Originally published on abcnews.com.np.