पोखरा । पर्वतको महाशिला गाउँपालिकाले बाढी प्रभावित क्षेत्रका लागि एक लाख ११ हजार एक सय ११ रुपैयाँ सहयोग गर्ने भएको छ।

गाउँ कार्यपालिकाको बुधबार बसेको बैठकले प्रधानमन्त्री दैवी प्रकोप उद्धार कोषमा उक्त रकम जम्मा गर्ने निर्णय गरेको प्रमुख प्रशासकीय अधिकृत देवेन्द्र पाण्डेयले जानकारी दिए।

रसुवाको भोटेकोशीमा आएको भीषण बाढीबाट रसुवासहित नुवाकोट, धादिङ, गोरखा लगायतका जिल्लामा ठूलो जनधनको क्षति भएको भन्दै गाउँपालिकाले दुःख व्यक्त गरेको छ।

गाउँपालिकाले जारी गरेको विज्ञप्तिमा बाढीमा ज्यान गुमाएकाप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरिएको छ। साथै, घाइतेहरूको शीघ्र स्वास्थ्यलाभको कामना गरिएको छ।

बाढीबाट प्रभावित नागरिकको उद्धार, राहत तथा पुनःस्थापनामा सहयोग पुर्‍याउने उद्देश्यले उद्धार कोषमा रकम सहयोग गर्ने निर्णय गरिएको गाउँपालिकाले जनाएको छ।

Originally published on abcnews.com.np.