काठमाडौं । रसुवाको लाङटाङ खोला किनारमा लाङटाङ हाइड्रोपावरको काममा खटिएका १८ जना कामदार उद्धारको पर्खाइमा रहेका छन्। उनीहरूले टेलिफोनमार्फत तत्काल उद्धारको पहल गर्न आग्रह गरेका छन्।

कामदार नरेन्द्र रतोजीका अनुसार उनीहरूमध्ये एक जना कामदार सुरुङभित्र करिब चार घण्टा फसेर उद्धार गरिए पनि गम्भीर घाइते भएका छन्। उनको टाउको तथा शरीरका विभिन्न भागमा चोट लागेको, रक्तस्राव भइरहेको र खुट्टा टेक्न नसक्ने अवस्था रहेको रतोजीले बताए।

उनका अनुसार हेलिकोप्टर आएपछि कामदारहरूले रातो कपडा देखाएर उद्धारका लागि संकेत गरेका थिए। तर, हेलिकोप्टरबाट उद्धार हुन नसकेको उनले बताए।

“लाङटाङ हाइड्रोपावरको काममा खटिएका कामदारलाई उद्धार गर्न आग्रह गरेका छौँ। एक कामदार गम्भीर घाइते छन्। हेलिकोप्टर आउँदा रातो कपडा देखाएर संकेत गरिए पनि उद्धार हुन सकेन,” रतोजीले भने।

अघिल्लो दिन उद्धार गर्ने आश्वासन पाए पनि अहिलेसम्म उद्धार टोली नपुगेको उनको भनाइ छ।

रतोजीले तत्कालका लागि आफूसँग खानेकुराको व्यवस्था रहेकाले छिटोभन्दा छिटो उद्धारको पहल गर्न सम्बन्धित निकायसँग आग्रह गरेका छन्।

Originally published on abcnews.com.np.