विराटनगर । सप्तकोसी नदीले पश्चिमतर्फ निरन्तर कटान गर्न थालेपछि सुनसरीको बराहक्षेत्र नगरपालिका–६ र ९ का बस्ती जोखिममा परेका छन्। नदीको धार परिवर्तनसँगै उदयपुरको बेलका नगरपालिका क्षेत्रमा पनि कटानको जोखिम बढेको छ।

स्थानीयवासीका अनुसार सप्तकोसीले लामो समयदेखि पश्चिमतर्फ कटान गर्दै आएको छ। पछिल्लो समय नदीको बहाव र धार परिवर्तनसँगै बराहक्षेत्रको श्रीलङ्का टापु क्षेत्र विशेष जोखिममा परेको उनीहरूले बताएका छन्।

कटानको जोखिम बढेपछि कोशी प्रदेशका मुख्यमन्त्री हिक्मतकुमार कार्कीले बिहीबार प्रभावित क्षेत्रको स्थलगत निरीक्षण गरेका छन्। उनले बराहक्षेत्र नगरपालिका–६ र ९ मा भइरहेको नदी कटान तथा त्यसबाट बस्तीमा परेको प्रभावबारे जानकारी लिएका हुन्।

तटबन्ध निर्माणका लागि सहयोग गर्ने प्रतिबद्धता

निरीक्षण टोलीमा कोशी प्रदेश सरकारका मन्त्री, प्रदेशसभा सदस्य, स्थानीय प्रशासन तथा स्थानीय तहका जनप्रतिनिधिको सहभागिता रहेको थियो।

मुख्यमन्त्री कार्कीले नदी कटान नियन्त्रणका लागि आवश्यक स्थानमा तत्काल तटबन्ध निर्माण गर्न प्रदेश सरकारले आवश्यक सहयोग गर्ने प्रतिबद्धता व्यक्त गरेका छन्।

पछिल्लो समय सप्तकोसीले उदयपुरतर्फ धार परिवर्तन गर्न थालेपछि कोसीपारिका बराहक्षेत्र नगरपालिका–६ र ९ का बस्ती तथा उदयपुरको बेलका नगरपालिका क्षेत्रमा समेत जोखिम बढेको जनाइएको छ।

अस्थायी तटबन्धका लागि स्थानीयको माग

स्थानीय जनप्रतिनिधिले तत्काल कटान नियन्त्रणका लागि बालुवाका बोरा लगायतका सामग्री प्रयोग गरी अस्थायी तटबन्ध निर्माण गर्नुपर्ने आवश्यकता औँल्याएका छन्। उनीहरूले यस कार्यका लागि नेपाली सेना र प्रहरीको सहयोग तथा समन्वय गरिदिन मुख्यमन्त्री कार्कीसँग आग्रह गरेका छन्।

मुख्यमन्त्री कार्कीले नदी किनारका बस्तीमा जोखिम बढ्दै गएकाले स्थानीयवासीलाई उच्च सतर्कता अपनाउन आग्रह गरेका छन्। साथै सम्भावित जोखिम न्यूनीकरण तथा प्रभावित बस्तीको सुरक्षाका लागि आवश्यक तयारी र समन्वय गर्न सम्बन्धित निकायलाई निर्देशन दिएका छन्।

Originally published on abcnews.com.np.