सिन्धुपाल्चोक । चीन स्वशासित तिब्बततर्फको ताल फुटेर रसुवामा भीषण बाढी आएपछि सिन्धुपाल्चोकको तातोपानी नाकामा उच्च सतर्कता अपनाइएको छ । चिनियाँ पक्षले रसुवा बाढीको प्रारम्भिक बिन्दुमा नदी थुनिएर अर्को ताल बनेको जानकारी दिएको छ, र सो ताल ३ दिनभित्र फुट्ने चेतावनीसहित सिन्धुपाल्चोक जिल्लामा उच्च सतर्कता जारी गरिएको जिल्ला प्रहरी प्रमुख एसपी काजीकुमार आचार्यले बताएका छन् ।

हालसम्म तातोपानी नाका हुँदै आवतजावतमा रोक लगाइएको छैन । रसुवा हुँदै मानसरोवर, गोसाईकुण्ड गएका थुप्रै मानिसहरू बाढीपछि फर्किने क्रममा तातोपानी नाकाको बाटो प्रयोग गरिरहेको एसपी आचार्यले जानकारी दिए ।

तातोपानी तर्फको तिब्बती भूभागमा पनि थुप्रै हिमताल रहेको र ती तालहरू पनि जोखिमयुक्त रहेको चिनियाँ पक्षबाट प्राप्त सूचनापछि तातोपानी नाकाका सम्पूर्ण व्यापारिक गतिविधि बुधबारदेखि नै बन्द गरिएको छ । सिन्धुपाल्चोकका बस्तीहरु बाढीको उच्च जोखिममा रहेकाले स्थानीय जनप्रतिनिधीहरूसँग समन्वय गरी सतर्कता अपनाइरहेको एसपी आचार्यले बताए । नदी तटीय क्षेत्रका बासिन्दालाई सचेत गराउने र सकेसम्म तटीय क्षेत्रमा बसोबासको सट्टा अन्य विकल्प खोज्न अनुरोध गरिएको छ ।

बाढीको चेतावनी

चिनियाँ पक्षले दिएको जानकारी अनुसार रसुवामा आएको बाढीको कारण नदी थुनिएर बनेको ताल ३ दिनभित्र फुट्ने सम्भावना रहेको छ । यसले गर्दा तातोपानी नाका आसपासका क्षेत्रमा जोखिम बढेको प्रहरीले जनाएको छ । जिल्ला प्रहरी प्रमुख आचार्यले बताएअनुसार, स्थानीयबासीलाई सुरक्षित स्थानतर्फ सारेको छैन, तर उनीहरूलाई निरन्तर जानकारी गराइरहेको छ । नदी किनारका वस्तीहरूलाई विशेष सावधानी अपनाउन आग्रह गरिएको छ ।

Originally published on abcnews.com.np.