काठमाडौँ । बाढीबाट प्रभावित घाइतेहरूको उपचारमा रगतको अभाव हुन नदिन वाईसीएल नेपालले आपतकालीन रक्तदान कार्यक्रम आयोजना गरेको छ। काठमाडौँस्थित केन्द्रीय कार्यालय पेरिसडाँडामा आयोजित कार्यक्रममा १७० जनाले रक्तदान गरेका छन्।

वाईसीएल नेपालका केन्द्रीय सचिव धिरज उपरकोटीका अनुसार बाढी प्रभावित क्षेत्रमा घाइतेहरूको उपचारका क्रममा रगतको आवश्यकता बढ्न सक्ने अवस्थालाई ध्यानमा राख्दै आपतकालीन रक्तदान कार्यक्रम आयोजना गरिएको हो।

बाढी प्रभावित क्षेत्रमा ६०० स्वयंसेवक परिचालन

वाईसीएल नेपालका केन्द्रीय अध्यक्ष पुष्प ओलीले बाढी प्रभावित क्षेत्रमा उद्धार, राहत तथा सहयोगका लागि संगठनका ६०० स्वयंसेवक परिचालन गरिएको जानकारी दिए।

उनका अनुसार जिल्ला प्रशासन कार्यालय, सुरक्षा निकाय तथा स्थानीय तहसँग समन्वय गरी रसुवा, नुवाकोट, धादिङ, गोरखा र चितवनलगायतका प्रभावित जिल्लामा स्वयंसेवकहरू खटिएका छन्।

राहत र उद्धारमा सहयोग

अध्यक्ष ओलीले प्रभावित क्षेत्रमा आवश्यक राहत सामग्री तत्काल उपलब्ध गराउन स्वयंसेवकहरूलाई निर्देशन दिइएको बताए। उद्धार कार्यमा सहयोग गर्नुका साथै घाइतेहरूको स्याहारसुसारमा समेत संगठनका स्वयंसेवकहरू परिचालित रहेको उनको भनाइ छ।

वाईसीएल नेपालले बाढीबाट प्रभावित नागरिकको उद्धार, राहत तथा उपचारमा सहयोग पुर्‍याउन देशभरका आफ्ना सदस्य, समर्थक तथा शुभेच्छुकहरूलाई समेत आवश्यक सहयोगका लागि आह्वान गरेको छ।

Originally published on abcnews.com.np.