जनकपुरधाम । भोटेकोसी नदीमा आएको विनाशकारी बाढीपछि मधेस प्रदेशका विभिन्न जिल्लाका थप ५८ जना नागरिकसँग सम्पर्क विच्छेद भएको छ। प्रदेश प्रहरी कार्यालयले सम्पर्कविहीन व्यक्तिहरूको विवरण संकलन तथा खोजी कार्य अघि बढाएको जनाएको छ।

प्रदेश प्रहरी कार्यालयका प्रवक्ता प्रभुप्रसाद ढकालका अनुसार विभिन्न जिल्लाबाट नागरिक सम्पर्कविहीन भएको सूचना आउन थालेपछि जिल्लास्थित प्रहरी कार्यालयमार्फत उनीहरूको विवरण संकलन भइरहेको छ।

हालसम्म प्राप्त विवरणअनुसार सप्तरीका ३२ जना, बाराका आठ जना, सर्लाहीका सात जना, पर्साका पाँच जना तथा रौतहट र धनुषाका दुई–दुई जना सम्पर्कविहीन रहेका छन्।

प्रवक्ता ढकालले बाढी प्रभावित क्षेत्रबाट प्राप्त सूचना तथा सम्पर्कविहीन व्यक्तिका परिवारजनले दिएको जानकारीका आधारमा विवरण संकलन भइरहेको बताए। उनले सम्पर्कविहीनहरूको वास्तविक अवस्था पत्ता लगाउन सम्बन्धित निकायसँग समन्वय गरी खोजी तथा उद्धारका लागि आवश्यक पहल भइरहेको जानकारी दिए।

विभिन्न जिल्लाबाट विवरण संकलन जारी

भोटेकोसी क्षेत्रमा आएको भीषण बाढीपछि प्रभावित क्षेत्रमा सडक, सञ्चार तथा अन्य पूर्वाधारमा क्षति पुगेकाले विभिन्न जिल्लाका नागरिकसँग सम्पर्क हुन नसकेको विवरण आउने क्रम जारी रहेको छ।

मधेस प्रदेश प्रहरी कार्यालयले सम्पर्कविहीन व्यक्तिहरूको संख्या थपघट हुन सक्ने जनाएको छ। परिवारजनबाट प्राप्त सूचना तथा बाढी प्रभावित क्षेत्रका स्थानीय प्रशासनसँग समन्वय गरी उनीहरूको अवस्था पत्ता लगाउने प्रयास भइरहेको बताइएको छ।

बाढीपछि देशका विभिन्न जिल्लाका नागरिक सम्पर्कविहीन भएको विवरण सार्वजनिक भइरहेका बेला मधेस प्रदेशबाट मात्र पछिल्लो विवरणअनुसार ५८ जना नागरिक सम्पर्कविहीन रहेको प्रहरीले जनाएको छ।

Originally published on abcnews.com.np.