तिब्बत (केरुङ सीमा क्षेत्र) । नेपाल–चीन सीमा क्षेत्रको ग्यारोङ बन्दरगाहनजिक पहिरोका कारण बनेको तालको पानी बढ्दै गएपछि चीनले उद्धार कार्य अस्थायी रूपमा स्थगित गरेको छ।

चिनियाँ सरकारी सञ्चारमाध्यमका अनुसार ग्यारोङ बन्दरगाहको माथिल्लो क्षेत्रमा पहिरोका कारण नदी थुनिएर बनेको तालमा पानीको मात्रा बढिरहेको छ। थप बाढी आउन सक्ने जोखिम बढेपछि उद्धारकर्तालाई तत्काल काम रोक्न निर्देशन दिइएको हो।

बाढीले बगाएर ल्याएको गेग्रान थुप्रिएर बनेको प्राकृतिक बाँधका कारण ताल बनेको र त्यसमा निरन्तर पानी जम्मा भइरहेकाले जोखिम बढेको चिनियाँ अधिकारीहरूले बताएका छन्।

उद्धार टोलीलाई एक किलोमिटर पछाडि हटाइयो

तालको पानीको सतह बढ्दै गएपछि सम्भावित थप बाढीबाट उद्धारकर्ताको सुरक्षालाई ध्यानमा राख्दै टोलीलाई घटनास्थलबाट करिब एक किलोमिटर पछाडि हट्न निर्देशन दिइएको छ।

चिनियाँ अधिकारीहरूले जोखिमको अवस्था मूल्यांकन गरिरहेका छन्। यसअघि चीनले ग्यारोङ बन्दरगाह क्षेत्रमा ठूलो उद्धार तथा राहत संयन्त्र परिचालन गरेको थियो।

प्राकृतिक बाँध फुटेमा तल्लो क्षेत्रमा पुनः ठूलो बाढी आउन सक्ने भएकाले चीन र नेपाल दुवैतर्फ उच्च सतर्कता अपनाइएको छ। नयाँ बनेको तालको पानी सुरक्षित रूपमा घटाउने उपायबारे प्राविधिक टोलीले अध्ययन गरिरहेको जनाइएको छ।

Originally published on abcnews.com.np.