काठमाडौँ । अस्ट्रेलियाले नेपालमा हालै आएको विनाशकारी बाढीबाट प्रभावित नागरिकका लागि ५० लाख अमेरिकी डलर बराबरको मानवीय सहायता उपलब्ध गराउने भएको छ।

बाढी प्रभावित क्षेत्रमा राहत, उद्धार तथा पुनर्स्थापना कार्यमा सहयोग पुर्‍याउन अस्ट्रेलियन सरकारले उक्त सहायता घोषणा गरेको हो। नेपालमा आएको बाढीका कारण ३९ जना अस्ट्रेलियाली नागरिक सम्पर्कविहीन भएको जनाइएको छ। उनीहरूको अवस्थाबारे हालसम्म जानकारी प्राप्त हुन सकेको छैन। अस्ट्रेलियाकी विदेशमन्त्री पेनी वङले नेपालमा बाढीबाट प्रभावित मानिसहरूलाई तत्काल सहायता उपलब्ध गराउन अस्ट्रेलिया तयार रहेको बताएकी छन्। प्रभावित क्षेत्रमा रहेका अस्ट्रेलियाली नागरिकलाई तत्काल सहयोग आवश्यक परेमा अस्ट्रेलियाको डिपार्टमेन्ट अफ फरेन अफेयर्स एन्ड ट्रेडको २४ घण्टे कन्सुलर इमर्जेन्सी सेन्टरमा सम्पर्क गर्न सकिने जनाइएको छ। अस्ट्रेलियाभित्रबाट १३०० ५५५ १३५ तथा अस्ट्रेलियाबाहिरबाट +६१ २ ६२६१ ३३०५ मा सम्पर्क गर्न सकिनेछ। अस्ट्रेलिया सरकारले उपलब्ध गराउने सहायता बाढीका कारण घरबास गुमाएका नेपाली नागरिकलाई तत्काल राहत उपलब्ध गराउन केन्द्रित हुने जनाएको छ। साथै, खोज तथा उद्धार कार्यमा सहयोग गर्नुका साथै प्रभावित क्षेत्रको पुनर्स्थापना प्रक्रियालाई गति दिन पनि सहयोग पुग्ने अपेक्षा गरिएको छ।

Originally published on abcnews.com.np.