काठमाडौँ । नेपाल–चीन सीमा क्षेत्रमा आएको विनाशकारी बाढीबाट प्रभावित समुदायका लागि अस्ट्रेलियाले ५० लाख अस्ट्रेलियन डलरको मानवीय सहायता उपलब्ध गराउने भएको छ ।

अस्ट्रेलियाका प्रधानमन्त्री एन्थोनी अल्बानिजले बाढी प्रभावित क्षेत्रमा सहयोग गर्न संकट तथा मानवीय प्रतिक्रिया विशेषज्ञहरू पठाउन लागिएको जानकारी दिनुभएको छ ।

सामाजिक सञ्जालमार्फत उहाँले बाढी प्रभावितका लागि खाद्यान्न, आपत्कालीन आश्रय तथा चिकित्सकीय सहयोग उपलब्ध गराउने बताउनुभएको छ । उहाँले बाढीबाट प्रभावित तथा आफ्ना आफन्तको अवस्थाबारे चिन्तित परिवारप्रति सहानुभूतिसमेत व्यक्त गर्नुभएको छ ।

अस्ट्रेलिया सरकारले नेपाल–चीन सीमा क्षेत्रका बाढी प्रभावित समुदायलाई लक्षित गरी ५० लाख अस्ट्रेलियन डलरको मानवीय सहायता प्याकेज घोषणा गरेको हो ।

नेपालमा ३९ अस्ट्रेलियाली बेपत्ता

यसैबीच, बाढीपछि नेपालमा कम्तीमा ३९ जना अस्ट्रेलियाली नागरिक बेपत्ता रहेको अस्ट्रेलियाली विदेशमन्त्रालयले जनाएको छ ।

बेपत्ता नागरिकको अवस्था पत्ता लगाउन तत्काल काम भइरहेको प्रधानमन्त्री अल्बानिजले बताउनुभएको छ ।

आपत्कालीन कन्सुलर सहयोग आवश्यक पर्ने अस्ट्रेलियाली नागरिकले DFAT को Consular Emergency Centre मा 1300 555 135 वा विदेशबाट +61 2 6261 3305 मा सम्पर्क गर्न सक्ने व्यवस्था गरिएको छ ।

Originally published on abcnews.com.np.