त्रिशूली । भदौ १० गते त्रिशूली नदीमा आएको भीषण बाढीले नुवाकोटको मेलुङस्थित अपर त्रिशूली जलविद्युत् आयोजनामा कार्यरत मजदुरहरूमा त्रास सिर्जना गर्यो। अचानक आएको बाढी र गेग्रानको भेलबाट ज्यान जोगाउन उनीहरूले हतारिँदै सुरक्षित स्थानतर्फ उकालो चढ्नुपरेको थियो।
दार्चुलाबाट एक महिनाअघि आयोजनामा काम गर्न आएका धीरेन्द्रबहादुर खड्काका लागि त्यो दिन जीवनकै सबैभन्दा डरलाग्दो क्षण बन्यो। सडकभन्दा केही माथि काम गरिरहेका उनी र उनका सहकर्मीले एक्कासि ठूलो आवाजसहित उर्लिएको पानी र गेग्रानको भेल देखे।
“कहाँबाट यति ठूलो पानी आयो भन्ने थाहै भएन, हामीले केही सोच्नै सकेनौँ, भागभाग मात्र भनियो,” खड्काले भने।
बाढी आउँदै गरेको पूर्वसूचना आफूहरूले नपाएको उनले बताए। तल रहेका मजदुरहरूलाई समेत सम्हालिन समय नभएको उनको भनाइ छ।
बाढीको वेग यति तीव्र थियो कि आयोजनामा प्रयोग भइरहेका एक्स्काभेटरसहितका उपकरणसमेत बग्न थाले। उपकरण बगाएको दृश्य देखेपछि धीरेन्द्र र उनका साथीहरू सुरक्षित स्थान खोज्दै माथितिर भागे।
“हामी अलि माथि नै थियौँ, भाग्न सक्यौँ। रोडमा काम गर्ने साथीहरू के भए, थाहा भएन,” उनले भने।
चट्टान र भीर छिचोल्दै उनीहरू सुरक्षित स्थानतर्फ अघि बढे। तलबाट उर्लिरहेको पानीको भेल र त्यसले बगाइरहेका ढुंगा, माटो तथा सामानको दृश्यले उनीहरूलाई झनै त्रसित बनाएको थियो।
‘बाँचिन्छ जस्तो लागेको थिएन’
लामो संघर्षपछि उनीहरू सडक नजिकको सुरक्षित स्थानमा पुगे। त्यहाँ रहेको सानो क्याम्पमा केही समय आश्रय लिए। थकान र त्रासले उनीहरू शिथिल बनेका थिए।
क्याम्पमा पुगेपछि उनीहरूले खाना पाए। तर बाढीको दृश्यले उनीहरूको मनबाट त्रास हटेको थिएन।
“त्यो छाल देख्दा बाँचिन्छ जस्तो लागेको थिएन,” धीरेन्द्रले भने, “अन्तिम श्वास यही हो भन्ने भयो।”
उर्लिएको पानी ढुंगा र माटोसहित घुम्दै आएको उनले बताए। केही क्षणमै आफूहरू पनि भेलमा बग्न सक्ने डरले भाग्नुबाहेक अर्को विकल्प नरहेको उनको भनाइ छ।
भाग्यवश ज्यान जोगिए पनि त्यो घटना सम्झिँदा अहिले पनि डर लाग्ने गरेको उनले बताए।
सुरक्षित भएपछि परिवारलाई फोन
सुरक्षित स्थानमा पुगेपछि धीरेन्द्रलाई परिवारको चिन्ता लाग्यो। मोबाइल सम्पर्क भएपछि उनले परिवारलाई फोन गरेर आफू सुरक्षित रहेको जानकारी दिए।
आफू सुरक्षित रहेको खबर परिवारलाई सुनाउँदा उनीहरूलाई पनि ठूलो राहत मिलेको उनले बताए।
धीरेन्द्रका अनुसार उनीसँगै काम गरिरहेका करिब ३० देखि ४० जना मजदुरले ज्यान जोगाएका छन्। उनीहरूमध्ये दार्चुलाबाट आएका ८–९ जना कामदार पनि छन्।
बाढीपछि आयोजनास्थल अस्तव्यस्त बनेको छ। भौतिक संरचना, उपकरण तथा सडकमा क्षति पुगेको छ। रोजगारीका लागि घरबाट टाढा आएका मजदुरका लागि उक्त घटना प्राकृतिक विपत्तिभन्दा पनि जीवन र मृत्युबीचको संघर्ष बनेको थियो।
‘हामीले नयाँ जीवन पायौँ’
मेलुङको भीषण बाढीबाट ज्यान जोगाएर त्रिशूली आइपुगेका धीरेन्द्रको अनुहारमा अझै पनि घटनाको त्रास देखिन्छ।
“हामीले नयाँ जीवन पायौँ, अब त्यो दृश्य जीवनभर बिर्सन सकिँदैन,” उनले भने।
Originally published on abcnews.com.np.
प्रतिक्रिया दिनुहोस्