काठमाडौ :  जल तथा मौसम विज्ञान विभागअन्तर्गतको मौसम पूर्वानुमान महाशाखाले शुक्रबार राति कोशी, बागमती र गण्डकी प्रदेशका केही स्थानमा भारी वर्षाको सम्भावना रहेको जनाएको छ।

महाशाखाका अनुसार कोशी, बागमती र गण्डकी प्रदेशका हिमाली तथा पहाडी भूभागका एक–दुई स्थानमा शुक्रबार राति भारी वर्षा हुन सक्ने सम्भावना छ।

हाल देशभर सामान्यदेखि पूर्ण बदलीको अवस्था रहेको छ। गण्डकी, कोशी, बागमती, लुम्बिनी, कर्णाली तथा सुदूरपश्चिम प्रदेशका केही स्थानमा हल्कादेखि मध्यम वर्षा भइरहेको महाशाखाले जनाएको छ।

शनिबार कोशी, बागमती र गण्डकी प्रदेशका हिमाली तथा पहाडी भूभागका केही स्थानमा भारी वर्षा हुन सक्ने पूर्वानुमान गरिएको छ।

त्यस्तै कर्णाली प्रदेशको पहाडी भूभाग तथा लुम्बिनी र सुदूरपश्चिम प्रदेशका पहाडी र तराई क्षेत्रका एक–दुई स्थानमा समेत भारी वर्षाको सम्भावना रहेको छ।

आइतबार कर्णाली र सुदूरपश्चिममा धेरै भारी वर्षाको सम्भावना

महाशाखाका अनुसार आइतबार पनि देशका विभिन्न क्षेत्रमा वर्षाको सम्भावना रहेको छ। कोशी, बागमती र गण्डकी प्रदेशका हिमाली तथा पहाडी भूभाग तथा लुम्बिनी, कर्णाली र सुदूरपश्चिम प्रदेशका पहाडी र तराई क्षेत्रका केही स्थानमा भारी वर्षा हुन सक्ने बताइएको छ।

विशेषगरी कर्णाली प्रदेशको पहाडी तथा सुदूरपश्चिम प्रदेशको पहाडी र तराई भूभागका एक–दुई स्थानमा धेरै भारी वर्षासमेत हुन सक्ने सम्भावनारहेको महाशाखाले जनाएको छ।

महाशाखाले भारी तथा धेरै भारी वर्षाको सम्भावना रहेका क्षेत्रमा पहिरो, बाढी, नदी तथा खोलामा पानीको सतह बढ्न सक्ने जोखिमप्रति सतर्क रहन आग्रह गरेको छ।

Originally published on abcnews.com.np.