काठमाडौँ । भोटेकोशी नदीमा बुधबार बिहान आएको विनाशकारी बाढीका कारण अवरुद्ध भएको रसुवाको सडक सञ्जाल पुनः सञ्चालनमा आएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार काठमाडौँ–टोखा–छहरे–गड्खारपुल–आप्र–नर्जा–लच्याङ–सरमथली–पाटीखर्क हुँदै बोगटीटार–कालिकास्थान–धुन्चे जोड्ने सडकखण्ड चारपाङ्ग्रे साना सवारीसाधन सञ्चालन गर्न मिल्ने गरी खुलाइएको हो ।

सडक सञ्चालनमा आएसँगै बाढीका कारण सडक सम्पर्कविहीन बनेको रसुवा पुनः सडक सञ्जालसँग जोडिएको प्राधिकरणले जनाएको छ ।

सडक सम्पर्क पुनःस्थापित भएपछि बाढी प्रभावित क्षेत्रमा राहत, उद्धार सामग्री, औषधि तथा अन्य अत्यावश्यक सामग्री पुर्‍याउन सहज हुने अपेक्षा गरिएको छ । साथै प्रभावित क्षेत्रबाट सर्वसाधारण तथा घाइतेलाई सुरक्षित स्थानतर्फ ल्याउनसमेत सडक खुलेसँगै थप सहज हुने भएको छ ।

भोटेकोशी नदीमा आएको बाढीले रसुवासहित नुवाकोट, धादिङ, गोरखा लगायतका जिल्लामा ठूलो जनधनको क्षति पुर्‍याएको छ । बाढीमा परी सयौँको मृत्यु भएको छ भने हजारौँ नागरिक अझै सम्पर्कविहीन रहेको सरकारी विवरण छ ।

सम्पर्कविहीन तथा प्रभावित नागरिकको खोजी, उद्धार र राहतका लागि नेपाली सेना, नेपाल प्रहरी, सशस्त्र प्रहरी बल तथा सम्बन्धित सरकारी निकायहरू परिचालन भएका छन् । प्रभावित क्षेत्रमा उद्धार, खोजी तथा राहत वितरणको काम निरन्तर भइरहेको प्राधिकरणले जनाएको छ ।

Originally published on abcnews.com.np.