काठमाडौं । नेपाल–चीन सीमावर्ती क्षेत्रमा आएको विनाशकारी बाढीपहिरोपछि करिब ९० जना अमेरिकी नागरिक अझै सम्पर्कविहीन रहेको अमेरिकी विदेश मन्त्रालयले जनाएको छ ।

विदेश मन्त्रालयका प्रवक्ता टमी पिगोटले हालसम्म कुनै पनि अमेरिकी नागरिकको मृत्यु भएको पुष्टि नभएको बताएका छन् । उनका अनुसार पाँच जना अमेरिकी नागरिकको सफल उद्धार भइसकेको छ ।

बाढीपहिरोबाट प्रभावित क्षेत्रमा सञ्चार सम्पर्क विच्छेद भएका कारण फोनमा सम्पर्क हुन नसकेका अमेरिकी पर्यटकसमेत सम्पर्कविहीनको सूचीमा समावेश गरिएको मन्त्रालयले जनाएको छ । उनीहरूसँग सम्पर्क स्थापित हुँदै गएपछि सम्पर्कविहीनको संख्या घट्न सक्ने अपेक्षा गरिएको छ ।

यसैबीच, काठमाडौं र बेइजिङस्थित अमेरिकी दूतावासले नेपाली तथा चिनियाँ सुरक्षा निकायसँग निरन्तर समन्वय गरिरहेको जनाएको छ । दूतावासहरूले सम्पर्कविहीन अमेरिकी नागरिकको अवस्थाबारे जानकारी लिन तथा उनीहरूको खोजी र उद्धारमा सहजीकरण गर्न सम्बन्धित निकायसँग समन्वय गरिरहेका छन् ।

नेपाल–चीन सीमाक्षेत्रमा बुधबार आएको बाढीपहिरोले रसुवा, नुवाकोट, धादिङलगायत नेपालतर्फका क्षेत्रमा ठूलो जनधनको क्षति पुर्‍याएको छ । सीमापारि चीनको तिब्बत क्षेत्रमा समेत बाढीपहिरोले ठूलो क्षति गरेको छ ।

सञ्चार तथा सडक सम्पर्कमा आएको अवरोधका कारण प्रभावित क्षेत्रमा रहेका नागरिकको वास्तविक अवस्थाबारे जानकारी संकलन गर्न कठिन भइरहेको छ । यस्तो अवस्थामा उद्धार टोलीले स्थल तथा हवाई माध्यमबाट खोजी कार्यलाई निरन्तरता दिइरहेका छन् ।

अमेरिकी नागरिकको खोजीका लागि स्थानीय सुरक्षा निकायसँगको समन्वयलाई प्राथमिकता दिइएको अमेरिकी पक्षले जनाएको छ ।

Originally published on abcnews.com.np.