काठमाडौं । रसुवाको भोटेकोसीमा आएको विनाशकारी बाढीपछि भारतले नेपालमा चौथोपटक राहत सामग्री पठाएको छ।

भारतको विदेश मन्त्रालयका अनुसार ११ टन राहत सामग्री बोकेको चौथो उडान नेपाल आइपुगेको छ। उक्त राहत सामग्री नेपाललाई हस्तान्तरणसमेत गरिएको मन्त्रालयले जनाएको छ।

चौथो चरणको सहयोगअन्तर्गत भारतले खोज तथा उद्धार कार्यका लागि आवश्यक उपकरणसहित सुरुङ प्राविधिक टोली पनि नेपाल पठाएको छ। बाढीमा फेला परेका शवको पहिचान तथा डीएनए विश्लेषणका लागि फोरेन्सिक विज्ञहरूको टोलीसमेत नेपाल पठाइएको मन्त्रालयले जनाएको छ।

राहत सामग्रीमा कम्बल, स्लिपिङ ब्याग, त्रिपाल, प्लास्टिक सिट तथा सरसफाइ किटलगायत सामग्री रहेका छन्।

२३० फिटको बेली ब्रिजका उपकरणसहित १६ ट्रक नेपाल आइपुगे

भारतले बाढीबाट क्षतिग्रस्त सडक तथा पुल पूर्वाधार पुनःस्थापनाका लागि २३० फिट लामो सिंगल लेन मोड्युलर स्टिल पुल निर्माण गर्न आवश्यक उपकरण बोकेका १६ ट्रक नेपाल पठाएको छ।

त्यस्तै, थप सातवटा बेली ब्रिज स्थापना गर्न आवश्यक उपकरणसमेत चाँडै नेपाल पठाइने भारतीय विदेश मन्त्रालयले जनाएको छ। बेली ब्रिज स्थापनाका लागि आवश्यक प्राविधिक टोलीसमेत नेपाल आउने अपेक्षा गरिएको मन्त्रालयले जनाएको छ।

भारतले यसअघि पनि भोटेकोसी बाढी प्रभावितका लागि राहत सामग्री तथा उद्धारसम्बन्धी सहयोग उपलब्ध गराउँदै आएको छ।

Originally published on abcnews.com.np.