काठमाडौं । लगातारको वर्षा, बाढी तथा पहिरोका कारण रसुवासहित विभिन्न जिल्लाका मुख्य राजमार्ग तथा सडकखण्डमा यातायात सेवा प्रभावितभएको छ।

सडक विभागका अनुसार इलाम, काभ्रेपलाञ्चोक, मकवानपुर, रसुवा र नुवाकोटका विभिन्न सडकखण्डमा यातायात प्रभावित तथा अवरुद्ध भएको हो।

नुवाकोटको शिवपुरी गाउँपालिका–५ स्थित घडेरीखोला क्षेत्रमा टोखा–छहरे सडकखण्ड पहिरोका कारण प्रभावित भएको छ।

त्यस्तै, मकवानपुरको हेटौँडा–टिङ्गन–बागमती–ललितपुर सडकखण्डमा सम्भावित बाढी तथा पहिरोको जोखिमलाई मध्यनजर गर्दै सवारीसाधन सञ्चालनमा रोक लगाइएको सडक विभागले जनाएको छ।

लगातारको वर्षाका कारण सडकमा जुनसुकै बेला बाढी तथा पहिरो आउन सक्ने भएकाले यात्रा गर्नुअघि सम्बन्धित सडकको अवस्थाबारे जानकारी लिन प्रहरीले आग्रह गरेको छ।

प्रहरीले जोखिमयुक्त क्षेत्रमा अनावश्यक यात्रा नगर्न तथा सडकको अवस्था प्रतिकूल देखिएमा सुरक्षित स्थानमा रहनसमेत आग्रह गरेको छ।

बाढीपहिरोको जोखिम कायम रहेकाले राजमार्ग तथा पहाडी सडकमा यात्रा गर्ने यात्रु तथा चालकलाई विशेष सावधानी अपनाउन प्रशासनले अनुरोध गरेको छ।

Originally published on abcnews.com.np.