काठमाडौं । नेपालमा आएको विनाशकारी बाढीपछि आपत्कालीन सञ्चारका लागि बाढी प्रभावित क्षेत्रमा निःशुल्क इन्टरनेट सेवा उपलब्ध गराउन स्टारलिंक तयार भएको छ ।

रसुवा, नुवाकोट, धादिङलगायत जिल्लामा बाढीले सडक, पुल तथा मोबाइल नेटवर्कको पूर्वाधारमा ठूलो क्षति पुर्‍याएपछि उद्धार तथा राहत कार्यमा सञ्चार चुनौती बनेका बेला स्टारलिंकले आवश्यक उपकरण तत्कालै तैनाथ गर्न तयार रहेको जनाएको हो ।

कम्पनीले नेपाल सरकारको अनुमति पाएलगत्तै प्रभावित क्षेत्रमा इन्टरनेट किट पठाएर सेवा सञ्चालन गर्न सकिने जनाएको छ । स्टारलिंकले नेपाल सरकार तथा मानवीय सहायता साझेदारलाई आपत्कालीन सञ्चारमा सहयोग गर्न आफूहरू तयार रहेको बताउँदै अनुमति पर्खिरहेको जनाएको छ ।

‘सरकारले अनुमति दिएलगत्तै किट तैनाथ गरी नेपाल सरकार र मानवीय सहायता साझेदारलाई सहयोग गर्न तयार छौँ,’ स्टारलिंकले भनेको छ ।

भदौ १० गते आएको विनाशकारी बाढीका कारण नेपाल–तिब्बत सीमा क्षेत्रसहित उत्तरी जिल्लामा ठूलो क्षति भएको भन्दै स्टारलिंकले दुःख व्यक्त गरेको छ । सडक, पुल र मोबाइल नेटवर्कको पहुँच अवरुद्ध भएको अवस्थामा स्याटेलाइट इन्टरनेट उद्धार तथा राहतका लागि महत्वपूर्ण वैकल्पिक सञ्चार माध्यम बन्न सक्ने कम्पनीको भनाइ छ ।

स्टारलिंकका अनुसार स्याटेलाइट इन्टरनेटमार्फत उद्धार टोलीले खोज तथा उद्धार अभियानमा आवश्यक समन्वय गर्न, स्वास्थ्यकर्मीले घाइतेको उपचारका क्रममा सञ्चार कायम राख्न तथा परिवारले सम्पर्कविहीन आफन्तसँग सम्पर्क गर्न सक्नेछन् ।

विद्युत्को स्रोत र आकाशतर्फ स्पष्ट दृश्य उपलब्ध भएमा स्टारलिंकको किट जडान गरेको केही मिनेटमै उच्च गतिको तथा कम विलम्बता भएको इन्टरनेट सञ्चालन गर्न सकिने कम्पनीले जनाएको छ ।

बाढी र पहिरोका कारण विशेषगरी रसुवालगायत उत्तरी क्षेत्रमा सडक तथा सञ्चार पूर्वाधारमा ठूलो क्षति पुगेको छ । यस्तो अवस्थामा स्थलीय पूर्वाधारमा निर्भर नहुने स्याटेलाइट इन्टरनेटले उद्धार, राहत तथा प्रभावित नागरिकबीच सम्पर्क कायम गर्न वैकल्पिक सञ्चारको भूमिका निर्वाह गर्न सक्ने देखिएको छ ।

Originally published on abcnews.com.np.