नवलपुर । भदौ १० गते रसुवामा आएको विनाशकारी बाढीका कारण स्वास्थ्य जोखिम बढ्न सक्ने भन्दै प्रदेश जनस्वास्थ्य कार्यालय, नवलपुरले सातबुँदे निर्देशन जारी गरेको छ ।

बाढीले बगाएर ल्याएका मानव शव, चौपाया तथा अन्य जनावर र जीवजन्तुका कारण सरुवा रोग फैलिन सक्ने भन्दै कार्यालयले विशेष सतर्कता अपनाउन आग्रह गरेको हो ।

कार्यालयले प्रदूषित नदी तथा खोलाबाट प्राप्त माछा तथा अन्य जलीय जीव सेवन नगर्न आग्रह गरेको छ । प्रदूषित पानीमा पौडी नखेल्न तथा पानी शुद्धीकरण गरेर मात्र प्रयोग गर्नसमेत अनुरोध गरिएको छ ।

दूषित पानीका कारण आउँ, हैजा, टाइफाइड, हेपाटाइटिस ‘ए’ र ‘ई’ लगायत झाडापखालाजन्य रोगको जोखिम बढ्न सक्ने कार्यालयले जनाएको छ ।

कार्यालयले खाना राम्रोसँग पकाएर मात्र खान, काँचो र पकाएको खाना छुट्टाछुट्टै राख्न तथा बाढीको पानीमा डुबेको, दूषित, कुहिएको वा गन्हाएको खाद्य पदार्थ सेवन नगर्न आग्रह गरेको छ ।

त्यस्तै, डेंगु, जापानिज इन्सेफ्लाइटिसलगायत लामखुट्टेबाट सर्ने रोग तथा सर्पदंशको जोखिमसमेत बढ्न सक्ने भन्दै घर वरिपरि पानी जम्न नदिन, झुल प्रयोग गर्न र लामो बाहुला भएका कपडा लगाउन कार्यालयले सुझाएको छ ।

राति हिँड्दा टर्चलाइट प्रयोग गर्न तथा सुत्नुअघि ओछ्यान जाँच गर्नसमेत आग्रह गरिएको छ ।

प्राकृतिक विपद्पछि मनोसामाजिक समस्या बढ्न सक्ने भएकाले आफ्नो मानसिक स्वास्थ्यमा समेत विशेष ध्यान दिन कार्यालयले अनुरोध गरेको छ ।

नदी तथा खोला किनारमा मानव शव वा मरेका जीवजन्तु फेला परे तत्काल सम्बन्धित स्थानीय तह वा नेपाल प्रहरीलाई जानकारी गराउन कार्यालयले आग्रह गरेको छ ।

Originally published on abcnews.com.np.