गाउँपालिकाको स्थानीय विपद् व्यवस्थापन समितिको आइतबार बसेको बैठकले प्रधानमन्त्री दैवी प्रकोप उद्धार कोषमा १० लाख रुपैयाँ जम्मा गर्ने निर्णय गरेको हो।

गत बुधबार भोटेकोसी नदीमा आएको भीषण बाढीबाट रसुवा, नुवाकोट र धादिङलगायत जिल्लामा ठूलो जनधनको क्षति भएकोप्रति दुःख व्यक्त गर्दै गाउँपालिकाले विपद् प्रभावितलाई सहयोग गर्ने निर्णय गरेको जनाएको छ।

गाउँपालिकाले जनप्रतिनिधिको सेवासुविधाबाट समेत थप सहयोग जुटाउने भएको छ। निर्णयअनुसार गाउँपालिका अध्यक्षको तीन महिनाको तथा अन्य जनप्रतिनिधिको एक महिनाको सेवासुविधाबापतको रकम प्रधानमन्त्री दैवी प्रकोप उद्धार कोषमा जम्मा गरिनेछ।

यस्तै, बाढीपीडितका लागि आवश्यक खाद्यान्न तथा जिन्सी सामग्री संकलन गरी प्रभावित क्षेत्रमा पठाउने तयारीसमेत गाउँपालिकाले अघि बढाएको छ।

राहत संकलन अभियानमा सहयोग गर्न मनहरी उद्योग वाणिज्य संघ, मध्यवर्ती क्षेत्र समिति, सामुदायिक वन उपभोक्ता समिति तथा विभिन्न सरकारी तथा गैरसरकारी संघसंस्था र नागरिकलाई गाउँपालिकाले अपिल गरेको छ।

राहत संकलन तथा वितरणलाई प्रभावकारी बनाउन वडा अध्यक्ष तथा तोकिएका सम्पर्क व्यक्तिसँग समन्वय गर्नसमेत गाउँपालिकाले आग्रह गरेको छ।

भोटेकोसी बाढीबाट प्रभावितको पीडामा स्थानीय तहको हातेमालो आवश्यक रहेको भन्दै मनहरी गाउँपालिकाले आर्थिक सहयोगसँगै राहत सामग्री संकलन अभियान अघि बढाएको हो।