पोखरा । भोटेकोशी बाढीमा परी मृत्यु भएकामध्ये १ सय २ जनाको शव पोखरा ल्याइएकोमा ८७ वटा शवको अझै पहिचान हुन सकेको छैन। शव व्यवस्थापन र आफन्तलाई हस्तान्तरण गर्न सहज होस् भनेर विभिन्न जिल्लाबाट शव पोखरा ल्याइएको थियो।

कास्की ल्याइएका शवमध्ये आइतबार साँझसम्म १५ वटा शव मात्रै आफन्तलाई हस्तान्तरण गरिएको छ। बाँकी ८७ शवको पोस्टमार्टम सम्पन्न भइसके पनि पहिचान खुल्न नसकेको प्रहरीले जनाएको छ।

लामो समयसम्म शव राख्दा कुहिन थालेपछि दुर्गन्ध फैलिन थालेको छ। त्यसपछि पहिचान हुन नसकेका शवको वैकल्पिक व्यवस्थापन गर्ने तयारी गरिएको छ।

कास्कीका सहायक प्रमुख जिल्ला अधिकारी चित्राङ्गत बरालका अनुसार शव व्यवस्थापनका लागि स्थानसमेत यकिन भइसकेको छ। यस विषयमा सोमबार बिहान सर्वदलीय बैठक बसेर आवश्यक निर्णय गर्ने तयारी गरिएको छ।

“लामो समय शव राख्दा बिग्रिने भएकाले व्यवस्थापनमा पनि अप्ठ्यारो भयो। पहिचान नभएकालाई बेवारिसे शव व्यवस्थापनसम्बन्धी निर्देशिका, २०७८ र अन्तर्राष्ट्रिय रेडक्रस (आईसीआरसी) को विपद्सम्बन्धी मार्गदर्शनलाई ध्यानमा राखेर व्यवस्थापन गर्ने तयारीमा छौँ,” बरालले भने।

जिल्ला प्रहरी कार्यालय कास्कीका प्रमुख प्रहरी उपरीक्षक नवीन कार्कीले सोमबारदेखि पहिचान हुन बाँकी शवको वैकल्पिक व्यवस्थापन सुरु गरिने जानकारी दिए।

“शवको पोस्टमार्टम चलिरहन्छ। पोस्टमार्टम भएका तर पहिचान हुन बाँकी शवको सोमबार बिहानदेखि वैकल्पिक व्यवस्थापन सुरु हुन्छ,” कार्कीले भने।

पहिचान हुन बाँकी शवको डीएनए नमुना, औँठाछाप तथा अन्य आवश्यक विवरण सुरक्षित राखेर व्यवस्थापन गरिने बताइएको छ। पछि सनाखत भएमा सम्बन्धित परिवारलाई शव हस्तान्तरण गर्ने व्यवस्था मिलाइनेछ।

Originally published on abcnews.com.np.