काठमाडौं । रसुवाको १११ मेगावाट क्षमताको रसुवागढी जलविद्युत् आयोजनामा उद्धार प्रयास प्रभावित भएको छ। आयोजनाको पावर हाउसमा लेदो र पानी भरिएका कारण उद्धार टोली भित्र प्रवेश गर्न नसकेको हो।

रसुवागढी हाइड्रोपावर कम्पनीका सचिव नरनाथ न्यौपानेका अनुसार पावर हाउसको अवस्था अनुमान गरिएभन्दा कठिन देखिएको छ।

“त्यति सुखद समाचार छैन। भित्र खुला छ कि भन्ने लागेको थियो। तर, सबै पुरिएको रहेछ। भित्र जाने अवस्था भएन। उद्धार टोली फर्किएको जानकारी आएको छ,” न्यौपानेले भने।

उद्धार गर्न नसकेपछि टोली धुन्चे फर्किएको उनले जानकारी दिए। पावर हाउसमा ठूलो मात्रामा लेदो र पानी भरिएकाले भित्र फसेकाहरूको अवस्था पत्ता लगाउनसमेत कठिन भएको छ।

भदौ १० गते भोटेकोशी नदीमा आएको भीषण बाढीले यस क्षेत्रमा रहेका जलविद्युत् आयोजनामा ठूलो क्षति पुर्‍याएको छ। बाढीले रसुवा तथा नुवाकोटका जलविद्युत् आयोजना, प्रसारण लाइन र अन्य पूर्वाधारमा समेत व्यापक क्षति पुगेको छ।

Originally published on abcnews.com.np.