काठमाडौं । रसुवाको भोटेकोसी नदीमा आएको विनाशकारी बाढीले बेत्रावती आसपासका करिब २०० घर पूर्ण रूपमा बगाएपछि स्थानीयले तत्काल प्रभावकारी खोज तथा उद्धार अभियान सञ्चालन गर्न सरकारसँग आग्रह गरेका छन्।

बाढीबाट बेत्रावती क्षेत्र तहसनहस भए पनि विपद्को गम्भीरताअनुसार राज्यको प्रभावकारी उपस्थिति नदेखिएको स्थानीयको गुनासो छ। उनीहरूले तत्काल उद्धार तीव्र पार्दै नागरिकको बाँच्न पाउने अधिकार सुनिश्चित गर्न माग गरेका छन्।

रसुवाको उत्तरगया गाउँपालिका–५, कैदेलेटारका स्थानीय विक्रम थापामगरका अनुसार पहिरोबेँसी, कैदेलेटार र बेत्रावती आसपासका करिब २०० घर बाढीले पूर्ण रूपमा बगाएको छ।

“त्यहाँ घरहरू केही पनि छैन। सबै बगरमा परिणत भएको छ। २०० घरजति थियो होला, त्यो केही पनि छैन,” थापामगरले भने।

विद्यालय गएका बालबालिकाको अवस्थाबारे चिन्ता

थापामगरले विद्यालय जान बसमा पठाइएका धेरै बालबालिका बाढीमा फसेको हुनसक्ने भन्दै तत्काल गम्भीरतापूर्वक खोजी तथा उद्धार अभियान सञ्चालन गर्न आग्रह गरे।

उनका अनुसार बाढीले बस्ती नै बगरमा परिणत गरेको अवस्थामा प्रभावित नागरिकको अवस्था अत्यन्तै दयनीय छ।

यस्तो ठूलो विपद्को समयमा समेत प्रभावित रसुवावासीले सरकारको पर्याप्त साथ र सहयोग नपाएको उनले गुनासो गरे।

स्थानीयले बेपत्ता नागरिकको खोजी, घाइतेको उद्धार, विस्थापितलाई सुरक्षित स्थानमा स्थानान्तरण तथा तत्काल राहत वितरणलाई प्राथमिकतामा राख्न सरकारसँग माग गरेका छन्।

Originally published on abcnews.com.np.