जनकपुरधाम । हरवा–चरवा समुदायको अधिकार र पुनःस्थापनाको माग गर्दै जनकपुरधामस्थित मधेस भवन अगाडि सुरु गरिएको धर्ना कार्यक्रम एक सातादेखि निरन्तर जारी छ।

हरवा–चरवा संघर्ष समिति मधेस प्रदेशको अगुवाइमा भइरहेको धर्नामा मधेस प्रदेशका आठवटै जिल्लाका प्रतिनिधिहरू सहभागी छन्।

संघर्ष समितिले हरवा–चरवा परिवारको लगत संकलन, प्रमाणीकरण तथा परिचयपत्र वितरणको प्रक्रिया तत्काल अघि बढाउन सरकारसँग माग गरेको छ।

लामो समयदेखि भूमिहीनता र श्रम शोषणको चपेटामा रहेका हरवा–चरवा समुदायको पहिचान गरी उनीहरूको दिगो पुनःस्थापनाका लागि स्पष्ट कार्ययोजना स्वीकृत गरी कार्यान्वयन गर्नुपर्ने समितिको मुख्य माग छ।

संघर्ष समितिका सदस्य लागेन्द्र सदाले सरकारले हरवा–चरवा समुदायको अधिकार र पुनःस्थापनाका विषयमा विगतमा गरेका प्रतिबद्धता कार्यान्वयन नगरेका कारण आफूहरू आन्दोलनमा उत्रिनुपरेको बताए।

“हामी एक सातादेखि आन्दोलित छौँ, तर सरकारी पक्षबाट हालसम्म कुनै सुनुवाइ भएको छैन। यदि हाम्रा मागलाई बेवास्ता गरिए अझै सशक्त आन्दोलन गर्न बाध्य हुनेछौँ।”

समितिले सरकारलाई आफ्ना मागप्रति गम्भीर बन्न तथा विगतमा भएका सम्झौता कार्यान्वयन गर्न ध्यानाकर्षण गराएको छ।

माग सम्बोधन नभएसम्म धर्ना तथा दबाबका कार्यक्रमलाई निरन्तरता दिने संघर्ष समितिले जनाएको छ।

Originally published on abcnews.com.np.