काठमाडौं । युरोपेली संघ (ईयू)ले ओपनएआईको च्याटजीपीटीसहित तीन ठूला डिजिटल प्लेटफर्मलाई कडा कानुनी दायरामा समेटेको छ।

ईयूले अगस्ट ३१ मा च्याटजीपीटीलाई ‘सर्च इन्जिन’को श्रेणीमा राख्दै थप नियमनको दायरामा ल्याएको हो। त्यस्तै, सामाजिक सञ्जाल प्लेटफर्म रेडिट र गेमिङ प्लेटफर्म रोब्लक्सलाई ‘अत्यन्त ठूला अनलाइन प्लेटफर्म’का रूपमा सूचीकरण गरिएको छ।

ईयूकी टेक प्रमुख हेना भिरकुनेनका अनुसार नागरिक तथा समाजमा यी प्लेटफर्मको व्यापक प्रभाव रहेकाले अब उनीहरूले उच्चस्तरीय अनुगमन र जवाफदेहिताका मापदण्ड पालना गर्नुपर्नेछ।

ईयूका २७ सदस्य राष्ट्रमा मासिक ४ करोड ५० लाखभन्दा बढी सक्रिय प्रयोगकर्ता भएका डिजिटल प्लेटफर्ममा यस्तो व्यवस्था लागू हुन्छ। च्याटजीपीटी, रेडिट र रोब्लक्सले आफूहरूसँग उक्त सीमाभन्दा बढी प्रयोगकर्ता रहेको स्वीकार गरेका छन्।

यी तीनै प्लेटफर्मलाई डिजिटल सर्भिसेज एक्ट (DSA) अन्तर्गतका अतिरिक्त दायित्व पूर्ण रूपमा पालना गर्न चार महिनाको समय दिइएको छ।

नयाँ व्यवस्थाअनुसार प्लेटफर्महरूले अवैध सामग्रीको प्रसार रोक्न, बालबालिका तथा नाबालिगमाथि पर्न सक्ने नकारात्मक प्रभाव न्यूनीकरण गर्न र प्रयोगकर्ताको शारीरिक तथा मानसिक स्वास्थ्यको सुरक्षा गर्न विशेष कदम चाल्नुपर्नेछ।

त्यसैगरी, निर्वाचन प्रक्रिया तथा सार्वजनिक सुरक्षामा हुन सक्ने जोखिम कम गर्न पनि थप व्यवस्था गर्नुपर्ने ईयूले जनाएको छ।

Originally published on abcnews.com.np.