काठमाडौं । इरानले दक्षिणी जिल्ला सिरिकको कुहेस्तक सहरमा वैवाहिक समारोह भइरहेको एउटा घरमा अमेरिकी वायुसेनाले बमबारी गरेको आरोप लगाएको छ। इरानी परराष्ट्र मन्त्रालयका प्रवक्ता इस्माएल बाघेईले घटनालाई ‘बर्बर आक्रमण’को संज्ञा दिँदै एक बालकसहित कम्तीमा पाँच जनाको मृत्यु भएको बताएका छन्। सिरिकका गभर्नर राजा शाहिदियानका अनुसार बुधबार बिहान भएको आक्रमणमा ६३ जना घाइते भएका छन्। घाइतेमध्ये ५० जनाभन्दा बढी महिला र बालबालिका रहेको उनले बताएका छन्। उनीहरूलाई नजिकैको मिनाब सहरस्थित अस्पतालमा उपचारका लागि भर्ना गरिएको छ। इरानी समाचार संस्था फार्ससँग कुरा गर्दै आक्रमणबाट बचेका एक बालकले लडाकु विमानको आवाज सुनेलगत्तै ठूलो विस्फोट भएको बताएका छन्। यता, अमेरिकी सेनाको सेन्ट्रल कमान्डले होर्मुज जलमार्गमा इरानी रिभोलुसनरी गार्ड्सले व्यापारिक जहाजमाथि गरेको आक्रमणको प्रयासको जवाफमा इरानी सैन्य निकायलाई लक्षित गरी नयाँ आक्रमण गरिएको जनाएको छ। अमेरिकी सेन्ट्रल कमान्डले आक्रमण सर्वसाधारणलाई लक्षित गरेर नगरिएको स्पष्ट पारेको छ। अमेरिका र इरानबीच सैन्य तनाव चर्किरहेका बेला वैवाहिक समारोह भइरहेको घरमा समेत आक्रमण भएको इरानी आरोपले घटनालाई थप गम्भीर बनाएको छ।

Originally published on abcnews.com.np.