काठमाडौं । अमेरिकाले इरानमाथि हवाई तथा सैन्य हमलाको श्रृंखला तीव्र बनाएको अन्तर्राष्ट्रिय सञ्चारमाध्यमहरूले जनाएका छन्। जुलाई अन्तिम सातापछि सोमबार इरानमा पहिलो हमला गरेको अमेरिकाले मंगलबार पनि विभिन्न क्षेत्रमा आक्रमण गरेको बीबीसीले जनाएको छ।

अमेरिकी सेन्ट्रल कमाण्डका अनुसार स्ट्रेट अफ होर्मुजमा रहेका अमेरिकी सैन्य जनशक्ति तथा ढुवानी जहाजमाथि इरानले आक्रमणको प्रयास गरिरहेका कारण जवाफी कारबाही गरिएको हो।

इरानी सञ्चारमाध्यमहरूले देशका विभिन्न स्थानमा विस्फोटका आवाज सुनिएको जनाएका छन्। समाचार संस्था तास्निमका अनुसार क्वेसम द्वीपमा पटक–पटक ठूलो विस्फोट भएको आवाज सुनिएको थियो। कोनार्क र बन्दर अब्बास क्षेत्रमा पनि विस्फोटका ठूलो आवाज सुनिएको जनाइएको छ।

अमेरिकी हमलापछि इरानी सेनाले कडा जवाफी कारबाही गर्ने चेतावनी दिएको छ। इरानी सैन्य प्रवक्ता सरदार मोहेबीले अमेरिकाले अब आफ्नो कदमको परिणाम भोग्नुपर्ने चेतावनी दिएका छन्।

‘अब अमेरिका पछुताउने छ,’ उनले सामाजिक सञ्जाल एक्समार्फत चेतावनी दिएका छन्।

इरानी सेनाले अमेरिकी सेनालाई ‘आतंकवादी’ भन्दै इरानमाथि थप हमला गरिए त्यसको ठूलो मूल्य चुकाउनुपर्ने चेतावनीसमेत दिएको छ।

‘जति इरानमा आतंक बढाउँदै जान्छ, त्यति नै ठूलो क्षति बेहोर्न अमेरिका तयार होस्,’ इरानी सेनाको वक्तव्य उद्धृत गर्दै अलजजिराले जनाएको छ।

ट्रम्पको चेतावनी– ‘यो त सानो झट्का मात्रै हो’

यसैबीच अमेरिकी राष्ट्रपति डोनाल्ड ट्रम्पले इरानमाथि अझ ठूलो र शक्तिशाली हमला हुन बाँकी रहेको बताएका छन्।

ट्रम्पका अनुसार हालै गरिएको अमेरिकी सैन्य कारबाही ‘सानो झट्का’ मात्रै हो। उनले आगामी दिनमा थप शक्तिशाली हमला हुन सक्ने चेतावनी दिएका छन्।

‘यो त सानो झट्का मात्रै हो। ठूलो आक्रमण आउनै बाँकी छ,’ ट्रम्पले भनेका छन्।

ट्रम्पले इरानले स्ट्रेट अफ होर्मुजमा समुद्री धराप बिछ्याएर अमेरिकी सैन्य तथा ढुवानी गतिविधिलाई लक्षित गर्न खोजेको आरोप लगाएका छन्। उनका अनुसार इरानले अमेरिकाविरुद्ध आठवटा क्षेप्यास्त्रसमेत प्रहार गरेको छ।

इरानले अमेरिकी कारबाहीको जवाफ दिन तयारी गरेमा थप भीषण हमला गर्ने ट्रम्पको चेतावनी छ।

‘यदि इरानले जवाफी हमलाको तयारी गर्‍यो भने उसले अझै भीषण हमलाको सामना गर्नुपर्नेछ। त्यस हमलापछि इरानको केही पनि रहने छैन,’ ट्रम्पले चेतावनी दिएका छन्।

अमेरिका र इरानबीच पछिल्लो समय बढ्दै गएको सैन्य तनावसँगै स्ट्रेट अफ होर्मुजको सुरक्षालाई लिएर पनि चिन्ता बढेको छ। विश्वको महत्वपूर्ण ऊर्जा तथा व्यापारिक समुद्री मार्गमध्ये एक मानिने होर्मुज क्षेत्रमा सैन्य गतिविधि बढ्दा अन्तर्राष्ट्रिय ऊर्जा आपूर्ति र क्षेत्रीय सुरक्षामा समेत असर पर्न सक्ने चिन्ता व्यक्त गरिएको छ।

Originally published on abcnews.com.np.