सुर्खेत । रसुवाको भोटेकोसी–त्रिशूली नदीमा भदौ १० गते आएको भीषण बाढीपछि कर्णाली प्रदेशबाट सम्पर्कविहीन भएका २७० जनामध्ये ७५ जना आफन्तको सम्पर्कमा आएका छन् । एकजनाको शव फेला परेको छ भने अझै १९४ जनाको अवस्था अज्ञात रहेको छ ।

कर्णाली प्रदेश प्रहरी कार्यालयले मंगलबारसम्म संकलन गरेको विवरणअनुसार बाढीपछि रसुवा पुगेका तथा सम्पर्कविहीन भएका २७० जनामा २२९ पुरुष, ३३ महिला, पाँच बालक र तीन बालिका रहेका छन् ।

प्रदेश प्रहरी कार्यालयका सूचना अधिकारी एवं प्रवक्ता सन्तोषसिंह राठौरका अनुसार जिल्लागत रूपमा सबैभन्दा धेरै जुम्लाका ११३ जना सम्पर्कविहीन भएका छन् । सल्यानका ५९, सुर्खेतका २०, रुकुम पश्चिमका १९, मुगुका १९, जाजरकोटका ११, हुम्लाका १२, दैलेखका सात, कालीकोटका छ र डोल्पाका चारजना सम्पर्कविहीन रहेको प्रहरीको तथ्यांक छ ।

सम्पर्कविहीनमध्ये ६९ पुरुष, पाँच महिला र एक बालक गरी ७५ जना आफन्तको सम्पर्कमा आइसकेका छन् । सल्यानका एक पुरुषको भने शव फेला परेको प्रवक्ता राठौरले जानकारी दिए ।

अझै सम्पर्कमा आउन बाँकी १९४ जनामा १५९ पुरुष, २८ महिला, चार बालक र तीन बालिका छन् । ठूलो संख्यामा कर्णालीका नागरिक सम्पर्कविहीन भएपछि आफन्तहरू निरन्तर खोजी तथा सम्पर्कको प्रयासमा छन् ।

प्रहरीले सम्पर्कमा आएका व्यक्तिहरूको विवरण अद्यावधिक गर्दै बाँकी सम्पर्कविहीनको अवस्था पत्ता लगाउन खोजी तथा पहिचानको काम जारी राखेको जनाएको छ ।

Originally published on abcnews.com.np.