काठमाडौं । नुवाकोटको विदुर नगरपालिका–१०, बेत्रावतीस्थित उत्तरगया मिनिमार्टभित्र २४ वटा शव फेला परेका छन्।

भोटेकोसी नदीमा आएको विनाशकारी बाढीपछि सोमबार भएको खोजी तथा उद्धारका क्रममा मिनिमार्टभित्रबाट २४ शव फेला परेको जिल्ला प्रहरी कार्यालय नुवाकोटका प्रमुख एवं प्रहरी उपरीक्षक विपिन रेग्मीले जानकारी दिए।

‘हिजो एउटा घरमा २४ वटा शव भेटिएको हो, उत्तरगया मिनिमार्ट भन्ने रहेछ,’ एसपी रेग्मीले भने।

मिनिमार्टबाट निकालिएका शवमध्ये १० वटा काठमाडौंको महाराजगन्जस्थित त्रिवि शिक्षण अस्पताल पठाइसकिएको प्रहरीले जनाएको छ। बाँकी शवसमेत सोही अस्पताल पठाउने तयारी गरिएको छ।

घटनास्थलमा थप उद्धार तथा अनुसन्धान जारी रहेको एसपी रेग्मीले बताए। उनका अनुसार उक्त घरभित्र ठूलो मात्रामा बालुवा थुप्रिएको छ।

‘त्यहाँ टोली गएर हेर्दै छ, अनुसन्धान गर्दै छ। घरभित्र बालुवा नै बालुवा छ,’ उनले भने।

भदौ १० गते रसुवाको भोटेकोसी नदीमा आएको भीषण बाढीले नुवाकोटको बेत्रावती क्षेत्रमा ठूलो क्षति पुर्‍याएको थियो। त्यसयता प्रभावित क्षेत्रमा बेपत्ता तथा मृतकको खोजी जारी छ।

Originally published on abcnews.com.np.