काठमाडौं । नेपालस्थित चिनियाँ दूतावासले सीमावर्ती क्षेत्रमा पहिरो तथा बाढीको अवस्था देखिएपछि चीनले नेपाललाई दैनिक रूपमा जल तथा वातावरणीय तथ्यांक उपलब्ध गराउँदै आएको दाबी गरेको छ।

चीन मौसमी तथा जलसम्बन्धी तथ्यांकमा अपारदर्शी रहेको भन्दै आलोचना भइरहेका बेला चिनियाँ दूतावासले विज्ञप्तिमार्फत आफ्नो धारणा सार्वजनिक गरेको हो।

नेपालस्थित चिनियाँ दूतावासका प्रवक्ताले जारी गरेको विज्ञप्तिमा कठिन प्राविधिक चुनौतीका बाबजुद चीनले निरन्तर रूपमा वातावरणीय तथा जलसम्बन्धी तथ्यांक नेपालसँग साझा गर्दै आएको उल्लेख छ।

तथ्यांक लुकाइएको वा सूचना प्रवाहमा अपारदर्शिता अपनाइएको भन्ने आरोप ‘तथ्यहीन’ भएको दूतावासको दाबी छ। यस्ता आरोपले नेपाल र चीनबीच भइरहेको संयुक्त विपद् राहत तथा उद्धार प्रयासमा समेत नकारात्मक असर पार्न सक्ने प्रवक्ताले बताएका छन्।

दूतावासले मानवीय सहायताप्रतिको आफ्नो प्रतिबद्धता दोहोर्याउँदै विपद्बाट प्रभावित समुदायको पुनर्स्थापना तथा पुनर्निर्माणमा आवश्यक सहयोग जारी राख्ने जनाएको छ।

प्रवक्ताका अनुसार प्रभावित क्षेत्रको अवस्था सामान्य बनाउन नेपालसँगको समन्वयमा संयुक्त राहत कार्य तथा आवश्यक प्राविधिक सहयोगलाई निरन्तरता दिइनेछ।

पछिल्लो समय सीमावर्ती क्षेत्रमा बाढी, पहिरो तथा जलजन्य विपद्का घटना बढेसँगै सीमापारबाट आउने जलप्रवाह र मौसमसम्बन्धी पूर्वसूचनाका लागि चीनबाट प्राप्त हुने तथ्यांकको विश्वसनीयता र समयमै सूचना आदानप्रदानको विषयमा समेत बहस भइरहेको छ।

Originally published on abcnews.com.np.