काठमाडौं । भोटेकोशी नदीमा आएको विनाशकारी बाढीमा परी मृत्यु भएकामध्ये हालसम्म १ हजार ६८ जनाको शव फेला परेको नेपाल प्रहरीले जनाएको छ। बाढीमा परी अझै ४ हजार ६०६ जना सम्पर्कविहीन रहेको प्रहरीको पछिल्लो विवरण छ।

प्रहरी प्रधान कार्यालय नक्सालका अनुसार फेला परेका शवमध्ये ३० बालक, ३५ बालिका, २३२ महिला, ३७१ पुरुष र ४०० वटा आंशिक अंगसहितका शव रहेका छन्।

प्रहरीका अनुसार बाढी तथा पहिरो प्रभावित क्षेत्रमा खोज तथा उद्धार कार्य अझै जारी छ। फेला परेका शवको पहिचान तथा व्यवस्थापनको कामसमेत समानान्तर रूपमा अघि बढाइएको छ।

३ हजार ४५३ जना होल्डिङ सेन्टरमा

नेपाल प्रहरीका प्रवक्ता एवं प्रहरी नायब महानिरीक्षक अबिनारायण काफ्लेका अनुसार उद्धार गरिएका व्यक्तिमध्ये ३ हजार ४५३ जनालाई विभिन्न होल्डिङ सेन्टरमा राखिएको छ।

होल्डिङ सेन्टरमा रहेका व्यक्तिमध्ये नुवाकोटमा २ हजार ४६६, रसुवामा ३९८, धादिङमा २६० र काठमाडौंमा ३२९ जना रहेका छन्।

उद्धार गरिएकामध्ये ३ हजार २१४ पुरुष, १ हजार ५३० महिला र पहिचान नखुलेका १४ जना रहेको प्रहरीले जनाएको छ।

प्रभावित क्षेत्रबाट उद्धार गरिएका व्यक्तिलाई सुरक्षित स्थानमा राख्ने, आफन्तसँग सम्पर्क गराउने तथा आवश्यक राहत उपलब्ध गराउने कार्य भइरहेको प्रहरीको भनाइ छ।

५८ शव परिवारलाई बुझाइयो

बाढीमा परी मृत्यु भएका तथा फेला परेका शवको पहिचान र व्यवस्थापनको काम पनि भइरहेको छ।

प्रहरीका अनुसार हालसम्म ५८ वटा शव सम्बन्धित परिवार तथा आफन्तलाई हस्तान्तरण गरिएको छ। अन्य शवको पहिचान तथा आवश्यक कानुनी प्रक्रिया पूरा गर्ने काम जारी छ।

४ हजार ६०६ जना अझै सम्पर्कविहीन

प्रहरीको विवरणअनुसार सम्पर्कविहीन रहेका ४ हजार ६०६ जनामध्ये २ हजार ३१५ स्वदेशी पुरुष, ३६८ स्वदेशी महिला, २५१ विदेशी पुरुष र ३३० विदेशी महिला रहेका छन्।

त्यस्तै, अन्य दुई जना र फोनमार्फत टिपाइएको विवरणका आधारमा १ हजार ३४० जना समेत सम्पर्कविहीनको सूचीमा छन्।

यससँगै बाढीपछिको मानवीय संकट अझै गम्भीर रहेको देखिएको छ। हजारौँ मानिस सम्पर्कविहीन रहनुका साथै ठूलो संख्यामा शव फेला पर्ने क्रम जारी रहेकाले प्रभावित क्षेत्रमा खोज तथा उद्धार अभियानलाई थप तीव्र बनाइएको छ।

प्रहरी, नेपाली सेना, सशस्त्र प्रहरी तथा स्थानीय तहका टोलीहरू प्रभावित क्षेत्रमा खोजी तथा उद्धारमा परिचालित छन्। विशेषगरी नदी किनार, पहिरोले पुरिएका संरचना तथा मानिस फसेको आशंका गरिएका स्थानमा खोजी केन्द्रित गरिएको छ।

Originally published on abcnews.com.np.