काठमाडौं । रसुवाको भोटेकोसी नदीमा आएको बाढीबाट प्रभावित परिवारको उद्धार तथा राहतका लागि गोदावरी नगरपालिका–३ का वडा अध्यक्ष राज घिमिरेले ५२ हजार रुपैयाँ सहयोग गर्ने भएका छन्। घिमिरेले उक्त रकम प्रधानमन्त्री दैवी प्रकोप उद्धार कोषमा जम्मा गर्ने निर्णय गरेका हुन्। रसुवागढी भन्सार क्षेत्र तथा भोटेकोसी नदी आसपासमा बाढीका कारण ठूलो जनधनको क्षति भएपछि उनले व्यक्तिगत रूपमा सहयोग गरेका हुन्। तिब्बतको ल्हेन्दे खोलाबाट आएको बाढीका कारण भोटेकोसी नदीमा आएको आकस्मिक बाढीले रसुवा, नुवाकोटलगायतका जिल्लामा ठूलो क्षति पुर्‍याएको छ। बाढीले घर, सडक, पुललगायतका भौतिक संरचनामा क्षति पुर्‍याउनुका साथै कतिपय परिवार विस्थापित भएका छन्। प्रभावित क्षेत्रमा उद्धार, खोजी तथा राहत वितरणको काम जारी छ। वडा अध्यक्ष घिमिरेले विपद्को समयमा सबैले आफ्नो क्षमताअनुसार सहयोग गर्नुपर्ने बताए। उनले आफूले सक्ने सहयोगस्वरूप उद्धार तथा राहतका लागि ५२ हजार रुपैयाँ उपलब्ध गराएको बताए। उनले विपद्मा परेका नागरिकलाई तत्काल राहत तथा पुनःस्थापनाका लागि सरकार र सम्बन्धित निकायले प्रभावकारी रूपमा काम गर्नुपर्ने बताए। साथै, आम नागरिकले पनि सरकारको राहत तथा उद्धार अभियानमा सहयोग गर्नुपर्ने उनको भनाइ छ। घिमिरेले यसअघि पनि विभिन्न विपद्का समयमा व्यक्तिगत रूपमा सहयोग गर्दै आएका छन्। उनले कोभिड–१९ महामारीका समयमा प्रभावित नागरिकलाई सहयोग गर्नुका साथै २०७२ सालको विनाशकारी भूकम्पका बेला पनि प्रभावित परिवारलाई व्यक्तिगत सहयोग गरेको बताइएको छ। रसुवामा बाढी आएपछि प्रभावित क्षेत्रमा राहत तथा पुनःस्थापनाका लागि विभिन्न स्थानीय तह, संघसंस्था र व्यक्तिहरूले आर्थिक तथा भौतिक सहयोग गरिरहेका छन्। प्रभावित परिवारलाई तत्काल राहत उपलब्ध गराउन यस्ता सहयोगले महत्वपूर्ण भूमिका खेल्ने अपेक्षा गरिएको छ।

Originally published on abcnews.com.np.