लेखनाथ, भदौ १७ गते । गण्डकी प्रदेशका प्रदेश सभा सदस्य फणीन्द्र देवकोटा ऊर्जा, जलस्रोत तथा खानेपानीमन्त्री नियुक्त हुनुभएको छ । मुख्यमन्त्री सुरेन्द्रराज पाण्डेले बुधबार मन्त्रिमण्डलमा हेरफेर गर्दै देवकोटालाई ऊर्जा, जलस्रोत तथा खानेपानीमन्त्री नियुक्त गर्नुभएको हो । गोरखा–२ बाट निर्वाचित देवकोटा नेपाली समाजवादी पार्टी (नयाँ शक्ति)का गण्डकी प्रदेश संयोजकसमेत हुनुहुन्छ । उहाँ तेस्रोपटक मन्त्री नियुक्त हुनुभएको हो । भदौ १० गते नेकपा (एमाले) सरकारबाट बाहिरिएपछि मुख्यमन्त्री पाण्डेले मन्त्रिमण्डलमा हेरफेर गर्नुभएको हो । यसअघि ऊर्जा, जलस्रोत तथा खानेपानीमन्त्री रहनुभएका नन्दप्रसाद न्यौपानेलाई भौतिक पूर्वाधार विकास तथा यातायात व्यवस्था मन्त्रालय र स्वास्थ्य मन्त्रालयको जिम्मेवारी दिइएको छ । मुख्यमन्त्री पाण्डेसँग अझै उद्योग तथा पर्यटन र कृषि मन्त्रालयको जिम्मेवारी रहेको छ । नेपाली कांग्रेस संसदीय दलका नेता पाण्डे २०८१ जेठ १६ गते मुख्यमन्त्री नियुक्त हुनुभएको थियो । ५९ सदस्यीय गण्डकी प्रदेश सभामा सरकार टिकाउन ३० जना प्रदेश सभा सदस्यको समर्थन आवश्यक हुन्छ । कांग्रेसका २७ प्रदेश सभा सदस्य छन् । नेसपाका देवकोटा र राष्ट्रिय प्रजातन्त्र पार्टी (राप्रपा)का दुई प्रदेश सभा सदस्यको समर्थनसमेत सरकारलाई रहेको छ । मुख्यमन्त्री पाण्डेले राप्रपाले सरकारमा जाने निर्णय गरेमा मन्त्रिमण्डलमा सहभागी गराउन आफूलाई कुनै समस्या नरहेको बताउनुभयो । मुख्यमन्त्री बनेपछि नेकपा (एमाले) र नेकपा (माओवादी केन्द्र)को समर्थनबिनै विश्वासको मत जुटाउनुभएका पाण्डेले एमाले सरकारबाट बाहिरिएपछि पुनः विश्वासको मत लिनुपर्ने विषयमा संविधानअनुसार अघि बढ्ने बताउनुभयो ।

Originally published on abcnews.com.np.