काठमाडौं । भदौ १० गते आएको विनाशकारी बाढीले अवरुद्ध भएको नेपालसँगको केरुङ सीमा नाका जोड्ने चीनतर्फको एकमात्र जी२१६ राष्ट्रिय राजमार्ग एक सातापछि पूर्ण रूपमा सञ्चालनमा आएको छ।

सिंगापुरस्थित समाचार संस्था च्यानल न्युज एसिया (सीएनए) का अनुसार सडक सम्पर्क पुनःस्थापित भएसँगै मुख्य विपद् प्रभावित क्षेत्रमा पहिलोपटक ठूला तथा भारी उद्धार उपकरण र मेसिन पुर्‍याउन सहज भएको छ।

चिनियाँ उद्धार टोलीले भीर, भत्किने जोखिममा रहेका पहाड तथा तीव्र गतिमा बगिरहेको नदीको साँघुरो खोँचमा निरन्तर काम गर्दै राजमार्गको क्षतिग्रस्त भागको पुनर्निर्माण गरी सडक सञ्चालनमा ल्याएको हो।

सडक पूर्ण रूपमा खुल्नुअघि बुधबार हेलिकोप्टरमार्फत उद्धार सामग्री तथा आवश्यक उपकरण प्रभावित क्षेत्रमा पुर्‍याइएको थियो।

चिनियाँ सीमा भन्सार कम्प्लेक्स पुरिएको क्षेत्रमा दर्जनौँ एक्स्काभेटर तथा अन्य भारी मेसिन परिचालन गरिएको सीएनएले जनाएको छ। पुरिएका व्यक्तिको खोजी गर्ने प्रविधि तथा तालिमप्राप्त कुकुरसहितका उद्धार टोलीलाई खोँच, नदी किनार र क्षतिग्रस्त पूर्वाधार क्षेत्रमा बेपत्ताको खोजीमा खटाइएको छ।

चीनको तिब्बत क्षेत्रमा बाढी र पहिरोका कारण हालसम्म १६ जनाको मृत्यु भएको पुष्टि भएको छ। २३ देशका २६१ विदेशी नागरिकसहित कुल ५४६ जना अझै बेपत्ता रहेको चिनियाँ अधिकारीहरूले बताएका छन्।

नेपालतर्फ भने बाढी र पहिरोका कारण ज्यान गुमाउनेको संख्या बुधबारसम्म एक हजार एक सय नाघेको विवरण सार्वजनिक भएको छ।

यसैबीच, माथिल्लो तटीय क्षेत्रमा बनेका अस्थायी तालहरूमा पानीको सतह घट्दै गएकाले सम्भावित ताल फुट्ने जोखिम केही कम भएको चिनियाँ अधिकारीहरूले बताएका छन्। तर भूभाग कमजोर रहेकाले थप पहिरो खस्ने जोखिम भने अझै कायम रहेको उनीहरूको भनाइ छ।

राजमार्ग पुनः सञ्चालनमा आएसँगै प्रभावित क्षेत्रमा उद्धार तथा राहत सामग्रीसँगै भारी उपकरण लैजान सहज हुने भएकाले खोज तथा उद्धार कार्य थप तीव्र हुने अपेक्षा गरिएको छ।

Originally published on abcnews.com.np.