काठमाडौँ, भदौ १८ गते । भदौ १० गते नेपालमा आएको विनाशकारी भोटेकोशी हिमबाढीपछि संयुक्त राज्य अमेरिकाले नेपाललाई थप मानवीय तथा विपद् प्रतिकार्य सहायता उपलब्ध गराएको छ। नेपालको नेतृत्वमा भइरहेको खोज, उद्धार तथा राहत वितरण कार्यमा सहयोग पुर्‍याउन अमेरिकी सेनाका दुईवटा कार्गो विमानमार्फत विपद् प्रभावितका लागि आपत्कालीन राहत सामग्री बुधबार नेपाल ल्याइएको हो। नेपालस्थित अमेरिकी दूतावासका अनुसार पाँच हजार थान विशेष राहत सामग्री, पाँच सय थान प्राथमिक उपचार किट, स्ट्रेचर तथा भारवहन उपकरण नेपाल ल्याइएको छ। नेपाल सरकारको अनुरोधमा उपलब्ध गराइएको उक्त सामग्रीसँगै बाढी प्रतिकार्यका लागि यसअघि घोषणा गरिएको ३ लाख ६० हजार अमेरिकी डलर बराबरको सहायता पनि जारी रहेको दूतावासले जनाएको छ। नेपाल–अमेरिकाबीचको दिगो साझेदारीलाई स्मरण गर्दै विपद्को यस घडीमा प्रभावित समुदायलाई सहयोग गर्नु अमेरिकी सरकारको साझा दायित्व भएको दूतावासले जनाएको छ। सहायता निरन्तर जारी रहने पनि दूतावासले स्पष्ट पारेको छ। यसैबीच, विनाशकारी हिमबाढीबाट प्रभावित समुदायलाई सहयोग गर्न अमेरिकी मानवीय संस्था ‘सामारिटन्स पर्स’मार्फत ४० टनभन्दा बढी आपत्कालीन राहत सामग्री पनि बुधबार काठमाडौं आइपुगेको छ। उक्त राहत सामग्रीमा पानी फिल्टर, त्रिपाल, कम्बल, सरसफाइका सामग्री तथा सोलार बत्ती रहेका छन्। सामग्री बाढी प्रभावित क्षेत्रमा कार्यरत स्थानीय संस्थामार्फत २ हजार ६ सय परिवारलाई वितरण गरिने जनाइएको छ। नेपालको आवश्यकताअनुसार जीवनरक्षासम्बन्धी सहायता उपलब्ध गराउन अमेरिकी दूतावासले नेपाल सरकार तथा विभिन्न साझेदारसँग निकट समन्वय गरिरहेको पनि जनाएको छ।

Originally published on abcnews.com.np.