काठमाडौं । बाढी पूर्वानुमान महाशाखाले आज बिहीबार देशका विभिन्न खोला तथा नदीमा बहाव बढ्ने र आसपासका क्षेत्रमा बाढीको असर पर्न सक्ने भन्दै सतर्कता अपनाउन आग्रह गरेको छ । महाशाखाले बिहीबार बिहान जारी गरेको बुलेटिनअनुसार काठमाडौंसहित ४८ जिल्लाका साना नदी तथा खोलामा बहाव उल्लेख्य बढ्ने र आकस्मिक बाढीको मध्यम जोखिम रहेको छ । हालै बाढीबाट ठूलो क्षति पुगेका रसुवा र नुवाकोट हुँदै बहने भोटेकोसी र त्रिशूली नदीसहित साना नदीमा भने बहाव उल्लेख्य बढ्ने तथा आकस्मिक बाढीको उच्च सम्भावना रहेको महाशाखाले जनाएको छ । महाशाखाका अनुसार आज ताप्लेजुङ, पाँचथर, तेह्रथुम, संखुवासभा, धनकुटा, भोजपुर, सोलुखुम्बु, ओखलढुंगा, खोटाङ, उदयपुर, दोलखा, रामेछाप, सिन्धुली, सिन्धुपाल्चोक, काभ्रेपलाञ्चोक, ललितपुर, भक्तपुर, काठमाडौं, धादिङ, मकवानपुर, चितवन, गोरखा, तनहुँ, लमजुङ, मनाङ, मुस्ताङ, म्याग्दी, कास्की, स्याङ्जा, पर्वत, डोल्पा, रुकुमपूर्व, रुकुमपश्चिम, सल्यान, जाजरकोट, सुर्खेत, दैलेख, कालीकोट, मुगु, हुम्ला, जुम्ला, अछाम, बझाङ, बाजुरा, डडेल्धुरा, बैतडी, दार्चुला र कञ्चनपुर आसपासका साना नदी तथा खोलामा बहाव बढ्ने सम्भावना छ । यी क्षेत्रमा आकस्मिक बाढीको मध्यम जोखिम रहेकाले नदी तथा खोला आसपासका बस्तीमा सतर्कता अपनाउन महाशाखाले आग्रह गरेको छ । विशेषगरी रसुवा र नुवाकोट हुँदै बहने भोटेकोसी, त्रिशूली तथा अन्य साना नदीमा बहाव उल्लेख्य बढ्ने भएकाले ती क्षेत्रमा आकस्मिक बाढीको उच्च जोखिम रहेको महाशाखाले जनाएको छ । महाशाखाले नदी तथा खोला आसपासका बासिन्दालाई सतर्क रहन तथा जोखिमयुक्त क्षेत्रमा आवश्यक सावधानी अपनाउन आग्रह गरेको छ ।

Originally published on abcnews.com.np.