काठमाडौं । कमसल चामललाई ब्रान्डेड चामलको बोरामा प्याकिङ गरी बिक्री गरेको आरोपमा प्रहरीले एक जनालाई पक्राउ गरेको छ।

काठमाडौं प्रहरीले बाफलस्थित केशरी नन्दन खाद्य स्टोर तथा श्री गढीमाई प्याकेजिङ उद्योगका सञ्चालक मुकेश सिंहलाई पक्राउ गरेको हो।

प्रहरीका अनुसार कुलेश्वरस्थित न्यू प्रकाश खाद्य उद्योगमा जय श्री फुड्स प्रालिको ‘भान्सा घर’ ब्रान्डको चामलको बोरा प्रयोग गरी कमसल चामल बिक्री भइरहेको सूचनाका आधारमा प्रहरी वृत्त कालीमाटीबाट खटिएको टोलीले उद्योगमा जाँच गरेको थियो।

जाँचका क्रममा प्रहरीले ‘भान्सा घर–लङ ग्रेन प्रिमियम स्पेशल राइस’ लेखिएको २० किलो दरका तीन बोरा कमसल चामल फेला पारेको थियो।

गोदाममा थप सामग्री बरामद

प्रहरीले गोदाममा कार्यरत व्यक्तिसँग सोधपुछ गर्दा उक्त कमसल चामल बाफलस्थित सिंह सञ्चालक रहेको उद्योगसँग सम्बन्धित रहेको खुलेको जनाएको छ।

त्यसपछि प्रहरीले सिंहको उद्योगको गोदाममा समेत खानतलासी गरेको थियो। खानतलासीका क्रममा प्रहरीले ‘भान्सा घर’ नाम लेखिएका २७ बोरा चामल, १० वटा खाली बोरा तथा ‘जय श्री फुड्स’ लेखिएका चामलका बोरा सिल गर्न प्रयोग हुने १० वटा प्लास्टिक स्टिकर बरामद गरेको छ।

कालोबजार मुद्दामा अनुसन्धान

पक्राउ परेका सिंहविरुद्ध कालोबजार तथा केही अन्य सामाजिक अपराधसम्बन्धी मुद्दामा जिल्ला प्रशासन कार्यालय, बबरमहलबाट म्याद थप गरी अनुसन्धान भइरहेको प्रहरीले जनाएको छ।

सिंह मोरङको विराटनगर महानगरपालिका–१०, तीनटोलियाका स्थायी बासिन्दा रहेको र हाल कुलेश्वरमा बस्दै आएको प्रहरीले जनाएको छ। उनी मुकेश कुमार नामले समेत चिनिने बताइएको छ।

Originally published on abcnews.com.np.