काठमाडौं । नेपाल भलिबल लिग (एनभीएल) को पहिलो संस्करण आजदेखि सुरु हुँदैछ । प्रतियोगितामा ६ टोलीले उपाधिका लागि प्रतिस्पर्धा गर्दैछन् ।

सिंगल राउन्ड रोबिन प्रणालीमा हुने प्रतियोगितामा प्रत्येक टोलीले एकअर्काविरुद्ध खेल्नेछन् । लिग चरणको शीर्ष टोली सिधै फाइनलमा पुग्नेछ भने दोस्रो र तेस्रो स्थानमा रहने टोलीले फाइनल प्रवेशका लागि प्लेअफ खेल्नेछन् ।

प्रतियोगितामा सगरमाथा स्म्यासर्स, मधेस वारियर्स, काठमाडौं रेड्स, अन्नपूर्ण स्पाइकर्स, कर्णाली यशविस र खप्तड फाल्कन्स सुदूरपश्चिम सहभागी छन् ।

केडिया ग्रुपको आयोजनामा हुने लिगको उद्घाटन खेलमा आज दिउँसो ४ बजे सगरमाथा स्म्यासर्स र मधेस वारियर्सबीच प्रतिस्पर्धा हुँदैछ । खेल त्रिपुरेश्वरस्थित राखेप कभर्डहलमा हुनेछ । यस्तै, राति ७ बजे अन्नपूर्ण स्पाइकर्स र कर्णाली यशविस आमनेसामने हुनेछन् ।

एनभीएलको विजेताले २० लाख रुपैयाँ पुरस्कार प्राप्त गर्नेछ । प्रतियोगिताको पहिलो दिन टिकट बिक्रीबाट संकलित सम्पूर्ण रकम बाढीपीडितको सहयोगका लागि प्रधानमन्त्री दैवी प्रकोप उद्धार कोषमा जम्मा गरिने आयोजकले जनाएको छ ।

Originally published on abcnews.com.np.